ЦАХИЛГААНЫ ҮНИЙГ ӨНӨӨДРӨӨС ЭХЛЭН НЭМЛЭЭ

Эрчим хүчний зохицуулах хорооноос цахилгааны үнийг нэмж байгаа талаар мэдээллээ.

Нэг кВт/цаг цахилгааны үнийг үндсэн өртөгт нь нийцүүлэн нэмж буй бөгөөд шинэчилсэн тарифыг өнөөдрөөс /2024.11.15/ эхлэн мөрдөнө.

Эрчим хүчний хэрэглээгээ хянах, хэмнэх сонирхлыг төрүүлэх, өрхөд очих төлбөрийн ачааллыг бага байлгахыг ийнхүү үнэ нэмэхдээ анхаарч, хэрэглээнээс хамааран 3 шатлалтай тарифыг нэвтрүүлсэн гэж мэдэгдэв

Айл өрхийн цахилгааны дундаж үнэ  1 кВт/ цаг тутамд 140 төгрөг байсан бол шинэчилснээр тухайн сарын эхний 150 кВт/цаг хүртэл 175 төгрөгөөр, 150-300 кВт/цагийн хооронд хэрэглэсэн бол 256 төгрөгөөр, 300 кВт/цагаас илүү гарвал 285 төгрөгөөр тус тус тооцох ажээ. Ингэснээр иргэд эрчим хүчийг хэрэглээндээ тохируулж хэмнэлттэй ашиглавал бага үнээр тооцогдож, төлбөр төлөх боломжтой. Ер нь айл өрхийн цахилгаан эрчим хүчний хэрэглээний 1 кВт/ц тутамд 35-131 төгрөгийн өөрчлөлт орж байгаа гэж мэдээлэлд дурдлаа. Нийт цахилгаан хэрэглэгч 788 мянга гаруй байгаагийн 45 хувь нь 150 кВт/цаг хүртэл, 40 хувь нь 150-300 кВт/цаг, 15 хувь нь 300 кВт/цагаас дээш цахилгааныг тус тус хэрэглэдэг байна. Цахилгааны өдөр, шөнийн  тариф дээр оройн оргил ачааллын цагийн тарифыг шинээр нэвтрүүлж байгаа гэнэ. Хэрэглэгч айл өрх уг цагийн ялгаварт гурван тарифыг сонгосон тохиолдолд шөнийн цагийн тарифт өөрчлөлт оруулахгүй, хэвээр мөрдөнө гэв.  

Гэр хорооллын айл өрхийн халаалтын улирлын цахилгааны шөнийн хөнгөлөлт хэвээрээ үргэлжилнэ. Нийгмийн халамжийн дэмжлэг, туслалцаа зайлшгүй шаардлагатай өрхийн тарифт өөрчлөлт оруулахгүй.

Аж ахуйн нэгж, байгууллагын цахилгааны тарифыг дунджаар 30 очрим хувийн өөрчлөлт оруулсан байна.

Улсын хэмжээнд айл өрхийн цахилгааны сарын дундаж хэрэглээ 220 кВт.ц байдаг ба 1 сарын цахилгааны төлбөр 36,220 төгрөг байсан нь 15,887 төгрөгийн өөрчлөлт орж 52,107 төгрөг болох юм.

Дулааны тарифыг өвлийн улирал эхэлж байгаа тул энэ удаад нэмэхгүй. 2025 оны 5 дугаар сарын 16-ны өдрөөс бодит өртөгт хүргэх юм байна.

Айл өрхийн цахилгаан, дулааны тарифт 2019 оноос хойш 5 жилийн хугацаанд өөрчлөлт оруулаагүй байсан. Үнэ, тарифт шинэчлэл хийж, зах зээлийн зарчимд нийцүүлж эхэлснээр эрчим хүчний салбарын санхүү, эдийн засгийн бие даасан байдал хангагдах боломж бүрдэнэ гэж мэдээллээ.