Сүүлийн 7 хоногийн буюу 2024 оны аравдугаар сарын 14-ний 8 цагаас аравдугаар сарын 21-ний 8 цаг хүртэлх цаг агаарын тоймыг танилцуулж байна.
Цасны зузаан: Өнөөөглөөний цаг уурын станц, харуулын цасны зузааны мэдээгээр Баян-Өлгийн баруун, Завхан, Баянхонгор, Архангай, Хөвсгөл, Булган, Эрдэнэт, Дархан-Уул, Сэлэнгэ, Төв, Говь-Сүмбэр, Хэнтийн ихэнх нутаг, Увс, Говь-Алтайн зарим газар, Өвөрхангай, Дундговь, Дорнодын хойд хэсгээр 0.0-20.0 см цасан бүрхүүл тогтсон байна. Үүнээс хамгийн их нь Сэлэнгийн Бугант, Булганы Баян-Агтад 20.0 см, Завханы Цагаанчулуутд 19.0 см, Булганы Хангал, Баянхонгорын Баянбулагт 16.0 см, Хүрээмарал, Хэнтийн Дадалд 15.0 см, Норовлин, Архангайн Чулуут, Түвшрүүлэх, Баянхонгорын Гурванбулагт 14.0 см, бусад хэсгээр 0.0-13.0 см цасан бүрхүүл тогтсон байна.
Хур тунадас: Өнгөрсөн 7 хоногт нийт нутгаар 0.0-26.6 мм бороо, нойтон цас, цас байна. Үүнээс 7 хоногийн хур тунадасны нийлбэрээр хамгийн их нь Баян-Өлгийн Булганд 26.6 мм, Говь-Алтайн Бугатад 26.0 мм, Завханы Цагаанчулуут, Цагаанхайрханд 22.8-25.0 мм, Ховдын Алтай, Баянхонгорын Хүрээмарал, Гурванбулагт 21.3-25.0 мм, Архангайн Чулуутд 20.0 мм, бусад нутгаар 0.0-19.4 мм бороо, нойтон цас, цас орсон байна.
Агаарын хамгийн их температур: Ихэнх хугацаанд Монгол-Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчмоор +3...+8 градус, Орхон-Сэлэнгийн сав газар, Эг, Үүр, Туул, Тэрэлж, Хэрлэн, Онон, Улз голын хөндийгөөр +9...+14 градус, Их нууруудын хотгор, говийн бүс нутгийн өмнөд хэсгээр +19...+25 градус, бусад нутгаар +14…+19 градус дулаан байв. Хугацааны сүүлээр ихэнх нутгаар 1-13 градусаар хүйтэрч Монгол-Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Орхон, Туул, Тэрэлж, Хэрлэн голын хөндийгөөр 0…-5 градус хүйтэн, Их нууруудын хотгор, Дорнод-Дарьгангын тал нутаг, говийн бүс нутгийн өмнөд хэсгээр +6…+11 градус, 0…+5 градус дулаан байв.
Агаарын хамгийн бага температур: Хугацааны сүүлээр бүх нутгаар 1-15 градусаар хүйтэрч Дархадын хотгор, Завхан голын эх, Хүрэнбэлчир орчмоор -16…-21 градус, Монгол-Алтай, Хангай, Хөвсгөл, Хэнтийн уулархаг нутаг, Идэр, Тэс, Эг, Үүр, Орхон, Сэлэнгэ, Хараа, Ерөө, Туул, Тэрэлж голын хөндийгөөр -10...-15 градус, Их нууруудын хотгор, говийн бүс нутгийн өмнөд хэсгээр 0…-5 градус, бусад нутгаар -6…-11 градус хүйтэн хоносон байна.
Cалхи: Ихэнх хугацаанд ихэнх нутгаар секундэд 6-11 метр, 19-нд Алтайн салбар уулс болон говь, талын нутгаар секундэд 12-14 метр, 20-нд говь, талын нутгаар секундэд 12-17 метр, зарим үед секундэд 25 метр хүрч ширүүссэн байна.
Улаанбаатар хот орчмоор:
Хур тунадас: 14, 16-нд 0.0 мм бороо, 20-21-нд 3.0-4.0 мм нойтон цас, цас орж цасан шуурга шуурсан байна. Бусад хугацаанд хур тунадас ороогүй байна.
Cалхи: Ихэнх хугацаанд секундэд 5-10 метр, 17, 20-нд түр зуур секундэд 12-14 метр хүрч ширүүссэн байна.
Агаарын температур: Шөнөдөө 10-р сарын 15, 18, 19-нд -9…-14 градус, бусад хугацаанд -2…-7 градус хүйтэн хоносон байна. Өдөртөө хугацааны дунд үеэр +6…+11 градус, бусад хугацаанд -2…+3 дулаан байв.
2024 оны 10 дугаар сарын 20-ны 08 цагаас 20 цаг хүртэлх цаг агаарын аюултай болон гамшигт үзэгдлийн тойм:
Нойтон цас: Аравдугаар сарын 19-20-нд шилжих шөнө Архангай аймгийн нутгаар 0.3-7.0 мм, Баянхонгор аймгийн нутгаар 0.6-8.0 мм, 20-ны өдөр Архангай аймгийн нутгаар 1.0-9.0 мм, нутгийн зүүн өмнөд хэсгээр 6.0-9.0 мм, Сэлэнгэ аймгийн нутгаар 0.3-7.0 мм, Орхон аймагт 5.0 мм, Өвөрхангай аймгийн нутгаар 0.2-7.0 мм, нутгийн хойд хэсгээр 5.0-7.0 мм, Дорнод аймгийн нутгаар 0.5-9.0 мм нойтон цас, цас орж цаг агаарын аюултай үзэгдлийн хэмжээнд, төв аймгийн нутгаар 0-12 мм, Лүн суманд 12 мм нойтон цас 8 цаг 30 минут, Хэнтий аймгийн нутгаар 2-11 мм, нутгийн хойд хэсгээр 10-11 мм нойтон цас, 8 цаг 10 минут үргэлжилж цаг агаарын гамшигт үзэгдлийн хэмжээнд хүрсэн байна.
Сэтгэгдэл (0)
Сэтгэгдэл бичигдээгүй байна