БНСУ-д ажлын айлчлал хийж байгаа Эрүүл мэндийн сайд Т.Мөнхсайхан эм үйлдвэрлэгч шилдэг аж ахуйн нэгж байгууллагуудтай уулзалт хийжээ.
Тухайлбал, Монгол Улсаас БНСУ-д суугаа Элчин сайдын яамнаас тус улсын эм, биобэлдмэл үйлдвэрлэгчдийн холбооны удирдлага, тус холбоонд харьяалагдах эм үйлдвэрлэгчдийн өргөтгөсөн уулзалтыг зохион байгуулсан байна. Энэ үеэр Сайд Т.Мөнхсайхан төрийн зүгээс эрүүл мэндийн салбарт, тэр дундаа эм хангамжийн салбарт авч хэрэгжүүлэх бодлогын арга хэмжээний талаар оролцогчдод танилцуулж, зарим үйлдвэрлэгчидтэй хоёр талын тусгайлсан уулзалтуудыг хийжээ.
Яамны зүгээс Монгол Улсад хэрэглэгдэж байгаа хүний эмийн чанар, аюулгүй байдлыг сайжруулах зорилтын хүрээнд чанартай, үр нөлөөтэй эмийг боломжийн үнээр ханган нийлүүлэх нөхцөлийг бүрдүүлэхээр Дэлхийн эрүүл мэндийн байгууллагаас хүлээн зөвшөөрч, эмийн зохицуулалт, хяналтын чиг үүргийг өндөр түвшинд гүйцэтгэдэг хэмээн үнэлэгдсэн улс орнуудын үйлдвэрлэгчидтэй эм, эмийн бүтээгдэхүүний хангамжийн чиглэлээр яриа хэлэлцээг идэвхтэй хийж байгаа юм.
Эм үйлдвэрлэгчтэй эмийн үнийн хэлцэл хийснээр эмчилгээний өндөр үр нөлөөтэй эмийг боломжийн үнээр нийлүүлэх боломжийг бүрдүүлэх юм. Ингэснээр төрөөс эмэнд зарцуулах зардлыг бууруулах төдийгүй эмнэлгийн тусламж үйлчилгээний чанарыг сайжруулах ач холбогдолтой. Эхний ээлжинд төрийн эрүүл мэндийн байгууллагуудад хэвтэн эмчлүүлж байгаа өвчтөнүүдийн эмнэлгийн тусламж үйлчилгээнд хэрэглэх эм болон эмчийн жорд үндэслэн Эрүүл мэндийн даатгалын сангаас үнийн хөнгөлөлт олгох, өргөн хэрэглэгддэг тодорхой нэр төрлийн эмүүдийг төр, хувийн хэвшлийн түншлэлийн хүрээнд Монгол Улсад импортлох нөхцөл боломжийг бүрдүүлэх юм.
Сэтгэгдэл (0)
Сэтгэгдэл бичигдээгүй байна