Олон улсын хүүхдийн эрхийг хамгаалах өдөрт зориулсан “Нэгдүгээрт хүүхэд” уриатай “Дэлхийн Монгол хүүхдүүд” арга хэмжээний хүрээнд 650 гаруй хүүхдийн парад боллоо.
Хүүхдүүд ханхүү, гүнж, торгон цэрэг, дамбо заан, алиалагч, анимэ, үлгэр, хүүхэлдэйн баатруудын дүрд хувирч, үндэсний хувцас, тугтай бүжиг, бөмбөр хөгжмөөр ялгаран "Шангри-ла" худалдааны төвөөс Сүхбаатарын талбай хүртэл алхсан юм. Мөн Монголын хүүхдийн ордны сурагчид үндэсний бүжиг бүжиглэж, Төрийн дуулал дуулснаар талбайн үйл ажиллагаа үргэлжилсэн.
Өмнө нь "багшран байдаг" жижиглэн худалдаа, хоол хүнс зэрэг үйлчилгээг Сүхбаатарын талбайд гаргахыг хориглож, “Туушин” зочид буудлын урд хэсэгт худалдаа, хоол хүнсний үйлчилгээг байршуулж, талбайн урд талд байрлах авто машины зогсоолд “Повер экспо” авто үзэсгэлэн болов.
Соёлын төв өргөөнд “Хөгжлийн харандаа” танин мэдэхүй, инновацын үзэсгэлэн, Монголын хүүхдийн ордонд “Хүүхдийн ертөнц” фестиваль, Хүй долоон худагт “Монгол хүү” арга хэмжээ, мөн дүүрэг тус бүр нутаг дэвсгэртээ хүүхдэд зориулсан арга хэмжээ зохион байгуулж байгууллаа.
Сэтгэгдэл (0)
Сэтгэгдэл бичигдээгүй байна