“Оюутолгой” ХХК-ийн Төлөөлөн удирдах зөвлөлийн ээлжит бус хурлыг өнөөдөр 17:00 цагаас хуралдуулахаар мэдэгдэл ирүүлсэн гэж ХЗДХ-ийн дэд сайд Б.Солонгоо мэдэгдлээ. Тэрбээр энэ хурлаар өмнөх хурлаар хэлэлцэхийг хойшлуулаад байсан Антре гоулд (Entree Gold) компанитай байгуулах хэлцэлд зөвшөөрөл олгох тухай асуудлыг хэлэлцэнэ гэдгийг тодотгож байна.
Мөн Антре гоулд компанийн эзэмшлийн 2 тусгай зөвшөөрлийг Оюутолгой ХХК шилжүүлэн авахтай холбоотой хэлцэл нь өнгөц харахад тус компанийн үйл ажиллагаа, хөрөнгө оруулалтын нэг хэлцэл мэт боловч үр дагавар ихтэй, нухацтай бодох шаардлагатай асуудал. Хэрэв энэ хэлцэл хийгдвэл Хөрөнгө оруулалтын гэрээний үйлчлэх хүрээг гэрээ байгуулах үед Оюутолгой ХХК эзэмшдэггүй байсан тусгай зөвшөөрөлтэй талбайд хамааруулж өргөжүүлнэ гэсэн үг.
Тодруулбал, Оюутолгой төслийн Хөрөнгө оруулалтын гэрээнд “Гэрээт талбай” гэх тодорхойлолт байдаг. Гэрээт талбайгаас олборлож худалдсан бүтээгдэхүүнд төлөх нөөц ашигласны төлбөрийг 5% тооцож тогтворжуулсан. Гэрээт талбайд Антре гоулд компанийн эзэмшдэг тусгай зөвшөөрөлтэй талбайг оруулах эсэх асуудал дээр дурдсан хэлцлийн үр дүнд шийдэгдэх бөгөөд үндсэндээ Хөрөнгө оруулалтын гэрээнд нэмэлт, өөрчлөлт оруулах асуудал хөндөгдөж байна.
Хөрөнгө оруулалтын гэрээ байгуулаад бараг 15 жил өнгөрчээ. Энэ хугацаанд үүссэн татварын маргааны асуудал шийдэгдээгүй төдийгүй улам төвөгтэй болохоор байна.
Антре гоулд компанийн тусгай зөвшөөрөлтэй талбайн хувьд өөрт ашигтай заалтыг Хөрөнгө оруулалтын гэрээнд тусгуулж, үйлчлэх хүрээг өргөжүүлэх боломжийг нээлттэй болгосон нь нэг талыг барьсан, манай талд ашиггүй гэрээ байгуулсны нэг л жишээ юм.
Дашрамд дурдахад, Антре гоулд компанийн гаргасан хувьцааны 16.5%-ийг Рио Тинто шууд бусаар эзэмшдэг. Хэлцлийн үр дүнд Антре компани шилжүүлсэн тусгай зөвшөөрөлтэй талбайнуудын эдийн засгийн үр өгөөжийн 20%-ийг хүртэхээр байна хэмээн байр сууриа илэрхийллээ.
Сэтгэгдэл (1)