“Жижиг, дунд үйлдвэрлэлийн салбарын бүтээмжийн өгөөжийн хуваарилалт” сэдэвт олон улсын арга хэмжээ Улаанбаатар хотноо 2024 оны 11 дүгээр сарын 5-8-ны өдрүүдэд болж байна.
Хөтөлбөрийг Жижиг дунд үйлдвэрийн газрын бодлого зохицуулалтын хэлтсийн дарга А.Гэрэлзаяа, Азийн бүтээмжийн байгууллагын Монгол дахь захирал Я.Эрхэмбаяр, тус байгууллагын хөтөлбөр хариуцсан ажилтан Донг Жин Ли нар албан ёсоор нээж, үг хэлсэн юм.
Жижиг дунд үйлдвэрийн газраас Азийн Бүтээмжийн Байгууллага, Монголын Бүтээмжийн төвтэй хамтран зохион байгуулж буй уг арга хэмжээнд Бангладеш, Камбож, Фижи, Энэтхэг, Лаос, Малайз, Непал, Пакистан, Филиппин, Тайвань, Шри-Ланк, Тайланд, Вьетнам улсуудаас 19, манай улсаас 7 төлөөлөгч оролцож байгаа юм.
Япон, Канад, Солонгос болон Монгол Улсын томоохон их дээд сургуулиудын доктор, багш нар удирдан явуулж буй тус сургалтад оролцогчид Бүтээмжийг нэмэгдүүлэх үзэл баримтлал, загваруудын хамгийн сүүлийн үеийн хэрэглээг ойлгох, Жижиг дунд үйлдвэрлэлд бүтээмж нэмэгдүүлэх загваруудыг хэрэгжүүлэх, тэдгээрийн зорилго, үнэт зүйлстэй уялдуулах, тасралтгүй сайжруулах соёлыг төлөвшүүлэхэд суралцаж байна.
Мөн арга хэмжээний хүрээнд “Эвсэг кашемир ХХК”, “АПУ ХК” болон “Эмэгтэйчүүдийн эрүүл мэндийн төв – Хөхний клиник”-ийн үйл ажиллагаатай танилцаж, бүтээмжийн арга хэрэгслийг хэрхэн амжилттай хэрэгжүүлж, амжилтад хүрч байгаа тухай туршлага судлах ба олон улсын төлөөлөгчид сурч мэдсэн зүйлсээ өөрийн дадлага туршлагатай хослуулан хэрхэн хэрэгжүүлэх боломж байгаа талаар төлөвлөгөө гарган, түүнийгээ танилцуулах юм.
Сэтгэгдэл (0)
Сэтгэгдэл бичигдээгүй байна