“Харри Поттер”-ийн зохиогч, Их Британийн зохиолч эмэгтэй Жоан Роулинг өөрийг нь баривчлахыг тэсэн ядан хүлээх болно хэмээн мэдэгдлээ.
Шотландын Үндэсний намаас сонгогдсон сайд Шобиан Браун Жоан Роулингийг хүйсээ солиулж эмэгтэй болсон хүмүүсийг үзэн ядсан гэсэн үндэслэлээр баривчлан хорьж ч болно гэж мэдэгдсэнд эгдүүцэн Жоан Роулинг ингэж мэдэгджээ.
Жоан Роулинг бол трансжендерүүдийн эсрэг үзэлтэй, ялангуяа эрэгтэй хүмүүс хүйсээ солиулж эмэгтэй хүн гэгдэж буйг эрс эсэргүүцэгч юм. Тэрбээр өөрийгөө эмэгтэй гэж буй зарим алдартай хүмүүсийг үнэндээ эрэгтэй хүн гэж хэлснийхээ төлөө ийнхүү баривчлагдахдаа ч тулж магадгүй болжээ.
“Хэрвээ хүний төрөлхийн хүйсийг үнэн зөвөөр нь хэлж ярьж болохгүй болчихсон юм бол Шотландад үг хэлэх эрх чөлөө, итгэл үнэмшил гээч үгүй болжээ. Яг одоогоор би хилийн чанадад байна. Хэрвээ миний хэлсэн, бичсэн хууль зөрчсөнд тооцогдож буй юм бол Шотландад очмогц минь баривчлахыг тэсэн ядан хүлээх болно” хэмээн Жоан Роулинг мэдэгдсэн байна.
Мөн твиттертээ хүйсээ солиулж эмэгтэй болсон алдартай 10 трансжендерийн тухай мэдээлэл ч оруулжээ. Тэдгээр хүмүүсийн дотор хоёр эмэгтэйг хүчиндсэн Исла Брайсоныг хүйсээ солиулсан тул эмэгтэй хүн гэж үзэн эмэгтэйчүүдийн шоронд хорих болсныг дурдав. Мөн залуу охид бүсгүйчүүдийг ангуучилж, нэгэн эмэгтэйг 27 цагийн турш тамлан хөнөөсөн 53 настай Эндрю Миллерийн төрөлх хүйс нь эрэгтэй хүн гэдгийг сануулжээ. Энэ мэтээр 10 алдартай трансжендерийг дурдсан байна.
Сэтгэгдэл (0)
Сэтгэгдэл бичигдээгүй байна