Өмнөд Солонгосын нийслэл Сөүлийн автобусны жолоочид цалингаа нэмүүлэхийг шаардсан ч шаардлагыг нь биелүүлээгүй тул өнөөдрөөс эхлэн ажил хаялт зарласан байна. Энэ ажил хаялт нь 9 сая хүн амтай их хотын хөдөлгөөнд томоохон саад болж, ажилдаа явах гэсэн хүмүүс хүндрэлтэй тулгарчээ.
Автобусны жолоочид ажил хаялт зарласан тул метроны ажиллах хугацааг сунгах, нэмэлт вагон гаргахаар болсон байна. Сөүлийн 25 дүүрэгт автобус нийт 480 маршрутаар үйлчилгээ үзүүлдэг. 12 жилийн өмнө Сөүлийн автобусны жолоочид ажил хаялт зарласан ч ердөө 20 минут үргэлжилсэн түүхтэй юм байна. Түүнээс хойш ажил хаялт зарлаагүй өдийг хүрчээ.
Энэ удаад жолооч нар цалингаа 12.7 хувиар нэмүүлэхийг шаардаж байгаа гэнэ. “Ойрын хугацаанд Мэргэжлийн холбоод болон удирдлагуудтай нь тохиролцоонд хүрэхийг хичээн ажиллана” хэмээн Сөүл хотын Зам тээвэр төлөвлөлтийн газрын тэргүүн Юн Чон Чан мэдэгдсэн бол хотын дарга О Сү Хүн “Хотын автобус бол хотын иргэдийн хөл гэсэн үг. Тэднээс өдөр тутмын амьдрал шууд шалтгаалдаг” хэмээн мэдэгдсэн байна.
Сэтгэгдэл (0)
Сэтгэгдэл бичигдээгүй байна