Төрийн өндөр албан тушаалтнуудын шүүхээр эцэслэн шийдвэрлэгдэлгүй он удсан хэргийн тоонд Барилга хот байгуулалтын сайдаар ажиллаж байсан З.Баянсэлэнгэ нарт холбогдох хэрэг ордог.
Улсын дээд шүүх өнөөдөр/2024.10.30/ Эрүүгийн хэргийн Танхимын нийт шүүгчийн хуралдаанаараа уг хэргийг хяналтын буюу шүүгчтэй хуралдаанаар хэлэлцэх эсэхээ шийдэхээр товложээ.
Улсын Их Хурлын гишүүн, Барилга хот байгуулалтын сайд асан З.Баянсэлэнгэ, тус яамны Үл хөдлөх хөрөнгийн зах зээл, гадаадын хөрөнгө оруулалтын хэлтсийн даргаар ажиллаж байсан Ж.Бурмаа, Төрийн захиргаа удирдлагын газрын даргаар ажиллаж байсан М.Болортуяа нар бүлэглэн албан тушаалын байдлаа урвуулан ашиглаж, улсын төсөвт 14 тэрбум гаруй төгрөгийн хохирол учруулсан, Улаанбаатар хотод түрээсийн орон сууцанд хамрагдах хүсэлтэй иргэдийн материалын бүртгэлийг зогсоосон байхад 2016 оны 7 дугаар сард давхардсан тоогоор 177 иргэн, үүнээс З.Баянсэлэнгэтэй шууд болон шууд бус хамааралтай тодорхой иргэдийн материалыг “Түрээсийн орон сууцны корпорац” төрийн өмчийн үйлдвэрийн газарт хүргүүлэх чиглэл өгсөн хэрэгт тэднийг анх холбон шалгаж эхэлсэн байдаг.
2020 оны сүүлээр прокуророос яллах дүгнэлт үйлдэж, хэргийг Сонгинохайрхан дүүргийн шүүхэд шилжүүлсэн ч прокурор руу буцах, дээд шатны шүүхээс доод шатны шүүх рүү буцсаар эцэслэн шийдвэрлэгдээгүй өнөөдрийг хүрсэн юм.
Хамгийн сүүлд Сонгинохайрхан дүүргийн Эрүүгийн хэргийн анхан шатны шүүх энэ оны зургадугаар сарын 4-нд З.Баянсэлэнгэ, Ж.Бурмаа, М.Болортуяа нарыг төрийн албан тушаалтан албаны эрх мэдэл буюу албан тушаалын байдлаа урвуулах гэмт хэрэг үйлдсэн гэм буруутайд тооцож, З.Баянсэлэнгэд 19 сая 200 мянга, Ж.Бурмаа, М.Болортуяа нарт тус бүр 9 сая 792 мянган төгрөгөөр торгох, мөн тодорхой албан тушаал эрхлэх, үйл ажиллагаа явуулах эрхийг 3 жил хасах ял оногдуулсан. Түүнчлэн “Бэрэн групп” ХХК-аас 935.179.036,80 төгрөгийг гаргуулж, хохирогч Монгол Улсын Сангийн яамд олгож шийдвэрлэсэн юм.
Нийслэлийн Эрүүгийн хэргийн давж заалдах шатны шүүх З.Баянсэлэнгэ, Ж.Бурмаа, тэдний өмгөөлөгчдийг гомдлын дагуу хэргийг энэ оны наймдугаар сарын 21-нд хэлэлцээд анхан шатны шүүхийн шийдвэрийг хэвээр үлдээсэн байдаг.
Хэрвээ Дээд шүүхийн Эрүүгийн танхим уг хэргийг хяналтын шатны шүүх хуралдаанаар хэлэлцэх шаардлагагүй гэж үзвэл З.Баянсэлэнгийг 19 сая 200 мянган төгрөгөөр торгох, Ж.Бурмаа, М.Болортуяа нарыг тус бүр 9 сая 792 мянган төгрөгөөр торгосон анхан болон давж заалдах шатны шүүхийн шийдвэр хэвээр үлдэнэ.
Харин хяналтын шатны шүүхээр хэлэлцүүлэхээр Эрүүгийн танхимын хуралдаанаас шийдвэрлэсэн тохиолдолд уг шийдвэрт өөрчлөлт орох магадлалтай юм.
Дээд шүүхийн Эрүүгийн хэргийн танхимын нийт шүүгчийн хуралдаанаар дээрхээс ч гадна хэд хэдэн авлига, албан тушаалын хэргийг 5 шүүгчтэй буюу хяналтын хуралдаанаар хэлэлцэх эсэхийг шийднэ.
Сэтгэгдэл (0)
Сэтгэгдэл бичигдээгүй байна