Н.БАЯРТСАЙХАНЫ ХЭРЭГ ДУУЛИАНТАЙ ЭХЭЛЖ, МӨН Л ЗАМХРАХ УУ?

УИХ-ын гишүүнээр гурван ч удаа сонгогдож, Монгол банкны Ерөнхийлөгч, Сангийн сайдыг албыг хашиж байсан Н.Баяртсайханыг Авилгатай тэмцэх газар өчигдөр орой /2024.10.24/ хойшлуулшгүйгээр баривчилсан нь олны анхаарлыг татаад байна.

Түүнийг Эрүүгийн хуулийн 22.1 дүгээр зүйлийн 3 дахь хэсэгт заасан улс төрд нөлөө бүхий этгээд эрх, мэдэл албан тушаалын байдлаа урвуулан ашигласан гэмт хэрэгт шалгаж байгаа гэх мэдээлэл байна.

Н.Баяртсайхан 2016-2019 онд Монголбанкны Ерөнхийлөгчөөр ажиллаж байсан бөгөөд Монгол Улс саарал жагсаалтад орсон болон бусад зүйлд түүнийг буруутган 2019 онд албан тушаалаас нь чөлөөлж байсан юм. Гэвч Н.Баяртсайхан Монголбанкийг тэргүүлж байхдаа харин ч нөхцөл байдлыг сайжруулсан гэж үзэж буйгаа илэрхийлж, УИХ-ын даргад нээлттэй захидал бичиж байсан билээ. Мөн энэ үеэрээ Н.Баяртсайхан арилжааны банкуудын асуудал саарал жагсаалтад нөлөөлөөгүй.  Асар дуулиантайгаар хэргүүдийг шалгаж эхэлдэг атлаа шүүх дээр хэрэг нь шийдэгддэггүй. Энэ байдал саарал жагсаалтад ороход нөлөө үзүүлсэн гэх мэтээр ярьж байсан юм.

Н.Баяртсайханд ч мөн л 2021 онд дуулиантайгаар хэрэг үүсгэн шалгаж эхэлсэн ч тэр нь өдийг хүртэл шийдэгдээгүй, хилээр гараад явчихсан гэсэн мэдээлэл байдаг. Тухайн үед Н.Баяртсайханыг Эрүүгийн хуулийн 22.1 дүгээр зүйлд зааснаар нийтийн албн тушаалтан эрх, мэдэл албан тушаалын байдлаа урвуулан ашигласан гэж үзсэн бөгөөд түүнийг шалгасан хэрэг нь “Капитал” банкинд тавих хяналтаа сулруулснаас тус банк Нийгмийн болон Эрүүл мэндийн даатгалын санд 240 тэрбумын хохирол учруулсан гэх хэрэг байсан юм.

Н.Баяртсайханыг саатуулсан гэх явдал өөрийнх нь хэлснээр асар дуулиантай эхэлж, хэрэг нь шийдэгдэхгүй үлдэх үү үгүй юу гэдгийг харах л үлдлээ.

Дашрамд авлигын эсрэг тэмцэж байна гэж байнга ярьж, хуулиа чангалж байгаа ч нийгэмд тэгш бус байдлыг үүсгэж буй асар хор хөнөөлтэй авлигын хэрэгт холбогдсон өндөр албан тушаалтнуудын хэрэг хууль, шүүхийн байгууллагын шатнаас буцаж, ял нь хөнгөрч байдаг нь эдгээр байгууллагад итгэх олон нийтийн итгэл алдагдах гол шалтгаан болсоор байдаг. Авлига албан тушаалын хэрэгт холбогдсон манай төрийн өндөр албан тушаалтнууд хамгийн ихдээ 4-5 жил хорих ял л эдэлсэн байдаг бөгөөд ихэнхийнх нь хэрэг хэрхсэн нь мэдэгдэхгүй замхарсан байдаг юм.