ӨМНӨГОВЬ АЙМАГ ХОРТ ХАВДРЫН ӨВЧЛӨЛ, НАС БАРАЛТААР УЛСЫН ХЭМЖЭЭНД ХАМГИЙН БАГА ҮЗҮҮЛЭЛТТЭЙ ГАРЧЭЭ

Эрүүл мэндийн сайд Ж.Чинбүрэн болон албаны хүмүүс Өмнөговь аймагт ажиллаж, эрүүл мэндийн салбарын удирдлага, эмч, ажилтнуудтай уулзлаа.

Уулзалтын үеэр иргэдийн эрүүл мэндэд тулгамдаж бус асуудал, эрүүл мэндийн байгууллагуудын үйл ажиллагаа, хүний нөөц, тоног төхөөрөмж, тусламж үйлчилгээний нөхцөл байдлын талаар ярилцсан байна. 

Өмнөговь аймаг нь Монгол орны хамгийн том газар нутагтай бөгөөд нийт хүн амын 64 хувь нь Даланзадгад, Цогтцэций, Ханбогд сумдад амьдардаг.

Аймгийн эрүүл мэндийн салбарт нийт 1233 ажилтан ажиллаж байгаагаас 23.9 хувь нь эмч, 20.6 хувь нь сувилагч байна. Хүний нөөцийн бүрдүүлэлт 86 хувьтай.

Өмнөговь аймгийн хүн амын дундаж наслалт 73.7 байна. Үүнээс эмэгтэйчүүдийн дундаж наслалт 78.3, эрэгтэйчүүдийнх 69.6 байгаа нь эмэгтэйчүүд эрэгтэйчүүдээс 8.7 жилээр урт насалж байна. Хүн амын дундаж наслалт, нас баралтад амьсгалын тогтолцоо, хоол боловсруулах эрхтэн, цусны эргэлтийн тогтолцоо, шээс бэлгэсний тогтолцоо, мэдрэлийн тогтолцооны өвчин голлон нөлөөлж байна. Эдгээр өвчлөлийг бууруулах зорилгоор эрт илрүүлэг, урьдчилан сэргийлэх үйл ажиллагааг үе шаттай хэрэгжүүлж байгаа талаар танилцууллаа.

Өмнөговь аймаг хорт хавдрын өвчлөл нас баралтаар улсын дундаж, 21 аймгаас хамгийн бага үзүүлэлттэй байна. 2025 онд аймгийн хэмжээнд нийт 652 хүн хорт хавдраар оношлогдож, 53 хүн нас барсан нь өмнөх оноос нас баралт буурсан үзүүлэлттэй байна. “Эрүүл элэг” хөтөлбөрийг хэрэгжүүлэн нийт 11,706 хүнийг элэгний хавдрын эрт илрүүлэгт хамруулж B, D вирустэй, хавдрын 36 тохиолдлыг оношлон, 45 хүнийг эмчилгээнд хамруулжээ.

Уул уурхай, тээвэр логистик эрчимтэй хөгжиж буй, хөдөлгөөнт хүн ам ихтэй тус аймаг эрүүл мэндийн салбартаа хамгийн их хөрөнгө оруулалтыг хийж байна. 2025 онд улс, орон нутгийн төсвөөр эрүүл мэндийн салбартаа нийт 21.5 тэрбум төгрөгийн хөрөнгө оруулалт хийсэн бол энэ онд барилга байгууламж, тоног төхөөрөмж, автомашины шинэчлэл зэрэгт нийт 22.8 тэрбум төгрөгийн хөрөнгө оруулалт хийхээр төсөвлөөд байгаа аж.

Эрүүл мэндийн салбарын эмч ажилтны нийгмийн хамгаалалд ихээхэн анхаарч нийт 105 эмч эмнэлгийн ажилчдад орон сууцны дэмжлэг үзүүлэн, 15 эмч, ажилтныг түрээсийн орон сууцад хамруулжээ. Түүнчлэн нутгийн дэм, орон нутгийн нэмэгдлийг сүүлийн гурван жилд тасралтгүй олгож байгаагаас гадна магистр, докторын сургалт, бусад мэргэжил дээшлүүлэх сургалтын төлбөрийг шийдэн, эмч ажилтнуудынхаа чадавхыг тасралтгүй сайжруулан ажиллаж байгаа тухайгаа эрүүл мэндийн байгууллагын удирдлагууд мэдээллэв.

2025 онд эмнэлгийн тусламж үйлчилгээндээ дараах шинэ технологиудыг нэвтрүүлжээ.
- Бамбай булчирхайн эсрэг бие илрүүлэх шинжилгээ Anti TSHR, Anti TPO, Anti TG
- Өөх тосны солилцоо Их нягттай липопротейн, Бага нягттай липопротейн
- Хавдрын маркер тодорхойлох шинжилгээ, Түрүү булчирхай, өндгөвч, нойр булчирхай, элэгний хавдарын маркер
- Бэлгийн замын далд халдварын 7-н үүсгэгч тодорхойлох шинжилгээ
- CRRT буюу Бөөр тасралтгүй орлуулах эмчилгээний аппаратаар хүнд өвчтөний шээсэн дэх хорт бодисыг шүүх эмчилгээг хийж байна.

Эрүүл мэндийн сайд Ж.Чинбүрэн орон нутгийнхаа эрүүл мэндийн салбарын тусламж үйлчилгээнд тасралтгүй хөрөнгө оруулалт хийж буй аймгийн удирдлагууд талархал илэрхийлж, эрт илрүүлэн, эрт оношилж эмчлэх тогтолцоог цаашид улам бэхжүүлэн ажиллах нь чухал гэдгийг тодотгов. Түүнчлэн эмч, ажилтнуудын санал хүсэлтийг сонсож, сонирхсон асуултуудад хариулсан байна.