Засгийн газрын 2024 оны арваннэгдүгээр сарын 27-ны өдрийн хуралдаанаар Мэргэжлийн болон техникийн боловсрол, сургалтыг дэмжих сангийн журмын төслийг хэлэлцүүлж, батлууллаа. Энэхүү журам батлагдсанаар хөдөлмөрийн зах зээлийн эрэлт хэрэгцээнд нийцсэн мэргэжилтэй хүний нөөцийг бэлтгэх, төр, хувийн хэвшлийн хамтын ажиллагааг бэхжүүлэх, сургалтын байгууллагыг хагас бие даасан тогтолцоонд шилжүүлж, сургалтын чанарт ахиц гарна хэмээн үзэж байна.
Мэргэжлийн болон техникийн боловсрол, сургалтыг дэмжих сангаас дараах:
- Иргэд ажлынхаа хажуугаар суралцах боломжийг бүрдүүлэх ХОСМОГ сургалт;
- Гадаадын ижил түвшний сургалтын байгууллагатай хамтарсан хөтөлбөр хэрэгжүүлэх;
- Багш, удирдах ажилтны мэргэжил дээшлүүлэх үндсэн болон мэргэшүүлэх сургалт, багшийн мэргэжлийн хөгжлийг дэмжих үйл ажиллагаа, багш, ажилтны гүйцэтгэлийн үнэлгээ;
- Мэргэжлийн ур чадварын олон улсын хэмжээний тэмцээнд бэлтгэх, оролцох, урамшуулах, үндэсний хэмжээний мэргэжлийн ур чадварын тэмцээнийг зохион байгуулах;
- Сургалтын хэрэглэгдэхүүн, тоног, төхөөрөмж, номын сангийн баяжилт нөхөн хангалт зэрэгт санхүүжилт олгохоор болсон байна.
Аж ахуйн нэгж байгууллагууд мэргэжлийн боловсролын сургууль, политехник коллежийн сургалтыг дэмжин ажиллаж санхүүгийн дэмжлэг, хандив өгсөн бол ажилтнаа бэлтгэх, ур чадвар дээшлүүлэх сургалтад хамруулах, мэргэжлийн ур чадварын түвшнийг тогтоолгох, дэвшилтэт техник, технологи ашиглах асуудлаар сургалтад хамрагдах боломжтой. Мөн Аж ахуйн нэгжийн орлогын албан татварын тухай хуульд зааснаар мэргэжлийн боловсролын сургууль, политехник коллежид үзүүлсэн санхүүгийн дэмжлэг, хандивын зардлыг тухайн жилийн борлуулалтын орлогын 1 хувиас хэтрэхгүй дүнгээр тооцон хасаж, хөнгөлөх зохицуулалт бий болсон байна.
Сэтгэгдэл (0)
Сэтгэгдэл бичигдээгүй байна