Ц.ЭЛБЭГДОРЖ: ХЭРЭГТ АВАГДСАН ГЭХ ЗҮЙЛ ЯМАР Ч ҮНДЭСЛЭЛГҮЙ, НАМАЙГ ГҮТГЭЛЭЭ

Цагдаагийн байгууллагаас Ерөнхийлөгч асан Ц.Элбэгдоржийг яллагдагчаар татах санал хүргүүлсэн талаар мэдээллээ.

Эрүүгийн цагдаагийн албаны Эдийн засгийн гэмт хэрэгтэй тэмцэх газрын Мөрдөн шалгах гэмт хэрэгтэй тэмцэх хэлтсийн дарга Э.Сэргэлэн "АНУ-аас ялтан солилцох, хэрэгт эрэн сурвалжлагдаж байгаа хүнийг эх орондоо авч ирэх боломж бий” гэж хэлсэн юм. 

Мөн  “Ачит Ихт” ХХК-тай холбоотой хэргийн мөрдөн шалгах ажиллагааны явцын талаар мэдээлэл өгч, Ерөнхийлөгч асан Ц.Элбэгдорж болон "Ачих Ихт" компанийн хувьцаа эзэмшигч П.Цагаан нарын viber чатыг хэрэгт авагдсан баримт гэж олон нийтэд ил болгосон. 

Уг чатад Ц.Элбэгдоржийн “Цагалбарын дансанд байгаа 13 сая төгрөгийг хөдөлгөх хэрэг гарлаа. Та бэлдэж байх уу?” гэсэн асуултад П.Цагаан “ За ойлголоо,яаралтай бэлдье. Сонгууль ч дөхлөө дөө” гэж хариулж, Ц.Элбэгдорж “Та гаргаж авах асуудалдаа хянуур хандаарай. Их хэмжээний мөнгө гаргаж байгаа болохоор асуудал үүсэж магадгүй. Сонгуульд ашиглах учир цэвэрхэн хиймээр байна.” гэх зэргээр бичсэн байсан юм. 

Харин Ерөнхийлөгч асан Ц.Элбэгдорж твиттер хуудастаа “Сая харуулж байгаа "хэрэгт авагдсан" гэх зүйл ямар ч үндэслэлгүй. Энэ тухай Ерөнхий сайд Л.Оюун-Эрдэнэ мөн ярьсан. Хуулийн дагуу үнэн зөвийг тогтоолгох болно. Намайг Засгийн тэргүүн, ажил хариуцсан цагдаагийн дүрэмт хувцастай албан хаагч биечлэн гүтгэлээ. Санаа тавьж буй олон хүнд баярлалаа. Хуулийн болон техникийн асуудлаар зөвлөх бол DM бичээрэй" гэж мэдэгджээ.