Монгол Улсын Ерөнхийлөгчийн Эрүүл мэнд, нийгмийн бодлогын зөвлөх Б.Бадамцэцэг БНСУ-ын Тархины боловсрол судлалын хүрээлэнгийн захирал, тархи судлалын доктор, гоц авьяастны боловсрол судлалын доктор, Midwest University-ийн профессор Хун Ян Пё, БНСУ-ын Тархины боловсрол судлалын хүрээлэнгийн дэд захирал, тархинд суурилсан гоц авьяастны боловсрол судлалын доктор, Midwest University-ийн профессор Ким Ён Сүг нартай ажил хэргийн уулзалт хийв.
Талууд хоёр улсын донтолтын чиглэлд хамтран ажиллах боломжуудын талаар ярилцаж туршлага солилцов. Зөвлөх Б.Бадамцэцэг хэлэхдээ, олон жилийн туршлага мэдлэгээсээ хуваалцаж хамтран ажиллаж буйд талархал илэрхийлэв. Монгол Улсад согтууруулах ундааны зохисгүй хэрэглээ болон донтолтоос үүдэлтэй хүн амын эрүүл мэнд, нийгэм, эдийн засгийн сөрөг үр дагаврыг бууруулах чиглэлээр хэрэгжүүлж буй ажлаа танилцуулсан юм. Тэрээр манай улсын хүн амын 6.2 хувь буюу ойролцоогоор 140 000 гаруй хүн архинд донтох эмгэгтэй гэсэн судалгааны дүн гарсан. Энэ чиглэлд хэрэгжүүлэх санал санаачилга бүрийг дэмжиж хамтран ажиллахаа Зөвлөх Б.Бадамцэцэг илэрхийлэв.
БНСУ-д хийгдсэн тархи судлалын судалгаагаар багадаа дэлгэцэд донтсон хүүхэд насанд хүрээд донтолтод өртөх магадлал өндөр гэдгийг тогтоосон байна. Тиймээс БНСУ ард иргэдээ донтолтод өртсөний дараа эмчлэхээсээ илүү донтохоос нь өмнө урьдчилан сэргийлдэг юм байна. Тус улсад хэрэглэж буй Neurofeedback аргачлалаар тархины урд хэсгийн эмчилгээний тусламжтайгаар бүх төрлийн донтолт, хамаарлаас гарах, уур бухимдал, стрессээ зохицуулах чадвартай болдог нь судалгаагаар тогтоогдсон талаар БНСУ-ын тархи судлалын доктор, профессорууд онцолсон юм.
Донтох эмгэгээс аль болох багаас нь урьдчилан сэргийлж байж үр дүнд хүрнэ. Тиймээс БНСУ донтох эмгэгийн төрлийн үйлчилгээг Засгийн газрын түвшиндээ хүртэл анхаарал хандуулж эрүүл мэндийн даатгалын системээр үйлчилгээ авах боломжийг бүрдүүлжээ.
Сэтгэгдэл (0)
Сэтгэгдэл бичигдээгүй байна