Байгаль орчин, уур амьсгалын өөрчлөлтийн сайд Б.Батбаатар Өвөрхангай аймагт ажиллах үеэрээ “Ногоон хэрэм” мод үржүүлгийн талбайд ажиллалаа.
“Ногоон Хэрэм” төсөл нь 2007 оноос эхлэн Монгол Улс болон БНСУ-ын Засгийн Газар хооронд хэрэгжиж буй уур амьсгалын өөрчлөлтийн эсрэг төсөл юм. Уг төслийн нэгдүгээр ээлж 2007-2016 он хүртэл хэрэгжиж, нийт 3046 га-д ойжуулалт хийжээ. Өвөрхангай аймгаас гадна Өмнөговь, Төв, Хөвсгөл, Сэлэнгэ зэрэг аймгуудад төслийн тусгайлсан нэгжүүд байгуулагдаж, ойжуулалт хийсэн байна.
Төслийн багийнхны зүгээс энэхүү уг талбайд мод үржүүлж, ойжуулалт хийгээд зогсохгүй уур амьсгалд тохирсон Шилмүүст модны хүлэмжийн үржүүлгийн технологийг туршиж амжилттай хэрэгжүүлж байгаагаа танилцууллаа. Хүлэмжийн үржүүлэг нь задгай үржүүлгээс найм дахин чанартай үрсэлгээ болдог аж. Уг талбайд мод үржүүлгээс гадна эмийн ургамал, зарим төрлийн нарийн ногоо зэргийг нутагшуулах төслийн дараагийн үе шатыг гурван жилийн өмнөөс эхлүүлэн ажиллаж байна.
Төслийг эрсдэлгүй, үр дүнтэй, тогтвортой хэрэгжүүлэх зорилгоор сургалт мэдээллийн төв бүхий цогц барилга, түймрийн эрсдэлийг эргэн тойрон 40 км радиус дотор мэдэрч дохио өгөх цамхаг, усалгааны ухаалаг систем, хөрс бордооны зоорь зэрэг цогц байгууламжийг Өвөрхангай аймагт байгуулжээ. Энэ хүрээнд БНСУ-аас мэргэжилтнүүд ирж тогтмол сургалт, судалгаа, хөгжүүлэлт хийж байна.
Үр дүнд нь орон нутгуудад энэ чиглэлээр мэргэжилтнүүд бэлтгэгдэж, ажлын байраар хангагджээ. Хоёр улсын Засгийн газар хооронд хэрэгжиж байгаа Ногоон хэрэм төсөл хэрэгжсэн талбайг ирэх 2026 онд Монголын талд хүлээлгэн өгөх юм. Тиймээс цаашид тогтвортой үргэлжлүүлэхэд салбарын яам анхаарах шаардлагатай байгааг төслийн удирдлагууд БОУАӨ-ийн сайд Б.Батбаатарт уламжиллаа.
БОУАӨ-ийн сайд Б.Батбаатар Өвөрхангай аймгийн албан томилолтоос буцахдаа Төв аймгийн Лүн сум дахь “Ногоон Хэрэм” төслийн хүрээнд байгуулагдсан Агро ойн аж ахуй үйл ажиллагаатай танилцав.
Төслийн эхний үеүүдэд Лүн суманд гурван ч хэсэгт ойжуулалт хийгдсэн бөгөөд 2022 оноос цөлжилтийн эсрэг агро аж ахуйн төслийг эхлүүлжээ. Лүн сум дахь Агро ойн аж ахуйн талбайд нийт 50 орчим га талбайд ойжуулалт хийгдэж, мөн л сургалтын төв, зориулалтын агуулах, ухаалаг услалтын систем зэргийг цогцоор байгуулж сүүлийн гурван жилд хүлэмжийн тариалалтыг амжилттай хэрэгжүүлж байна. Энэ хүрээнд төрөл бүрийн нарийн ногооны тариалалтыг Солонгос үрсэлгээгээр туршиж байгаа аж. Тухайлбал, улаан, ногоон чинжүү, хаш, хулуу, огурцы, удааг лооль, эрдэнэ шиш зэрэг нарийн ногооноос гадна Солонгос үрээр тарвас, газрын алим зэргийг туршсан нь амжилттай болсныг талбай хариуцагч дуулгалаа. БНСУ-аас мэргэжилтнүүд ирж орон нутгийн иргэдийг сургалтад хамруулан 15 хүртлэх хүнийг тогтвортой ажлын байраар хангаж байна. Сургалтад хамрагдаж туршлагажсан иргэдээс өрхийн хүрээнд тариалалт хийж эхэлсэн тохиолдлууд ч цөөнгүй гэлээ. Лүн сум дахь агро аж ахуйн талбайг 2026 онд манай улсад хүлээлгэн өгөх юм байна.
Сэтгэгдэл (0)
Сэтгэгдэл бичигдээгүй байна