Чуулганы өнөөдрийн /2024.10.25/ хуралдаан дээр УИХ-ын гишүүн Ц.Даваасүрэн “Баян, боломжтой айлын хүүхдүүдэд мөнгө өгч яах гээд байгаа юм бэ. Нүүрснийхээ мөнгөөр ялгадас үйлдвэрлэж яах гээд байгаа юм бэ. Нүүрс зогсвол бид байхгүй. Тиймээс нүүрснээс орж ирж байгаа мөнгөөрөө баялаг бүтээдэг болох хэрэгтэй шүү дээ. Улстөрчид ингэж, тэгж өгье гэхээр ард түмэн авъя гэхээс яах юм бэ. Бид улс орныг чиглүүлэх гэж энд сууж байгаагаас суудлын төлөө биш шүү дээ. Яг ийм халамж ярьдаг, орж ирсэн мөнгөө ялгадас болгох сэтгэхүйтэй байвал Монгол хэзээ ч хөгжихгүй.” гэж хэлэв.
Хүүхэд өөрөө ажил хийж, мөнгө олох эрхгүй учир баян хүүхэд гэж байхгүй гэдгийг хууль тогтоох байгууллагад олон жил “суусан” Ц.Даваасүрэн гишүүн ойлгодог баймаар байна. Эцэг эхийн орлогын байдлаас шалтгаалж, хүүхдийн мөнгийг зарим гэр бүлд олгохоо больсон тохиолдол бий. Тухайн үед байртай, машинтай дундаж орлоготой гэр бүлийн хүүхдүүд олноороо энэ шалтгаанаар хасагдаж байсан.
Хүүхдийн мөнгө бол халамж биш, ирээдүйдээ зориулсан зүйл юм гэдгийг олонх нь хүлээн зөвшөөрдөг. Гэтэл эрхэм гишүүн хүүхдүүдийг ялгаварлаж, ялгадас гэх мэт тааламжгүй үгсийг хэрэглэсэн нь иргэдийн дургүйцлийг төрүүлж байна.
Хүүхэд өөртөө зориулсан мөнгөөр чихэр авч идэх, эсвэл дугуйланд явах нь түүний эрх юм. Тэгэхээр хүүхэд мөнгөөрөө таны хэлсэн тааламжгүй үгийг бий болгодог хүнс авч идэхийг хэн нэгэн гишүүн хориглох боломжгүй. Дээр нь орчин үеийн хүүхдүүдэд орлоготой, тэгш эрхтэй байна гэдэг ойлголт хичнээн үнэтэй болохыг гишүүн ухаарахгүй байх шиг.
Ц.Даваасүрэн гишүүний охин Д.Долзодмаа нь АНУ-ын Пүрди их сургуульд инженерийн чиглэлээр 2012-2016 онд суралцахдаа Боловсролын зээлийн сангаас 191 мянган ам.доллар буюу 660 сая төгрөгийн зээл авч сурсан гэдэг асуудал дэгдэхэд тэрбээр үүнээс өөр байр суурьтай байсан. Тухайлбал Ц.Даваасүрэн "Манай охин зээлээр сураагүй, буцалтгүй тусламжийн тэтгэлгээр сурсан. Монголын төр нэг авьяастай иргэндээ бакалаврын сургалтын тэтгэлэг өгсөн нь ямар нэг хууль зөрчөөгүй." гээд хүүхдийг алаг үзэх ёсгүй хэмээн охиноо өмөөрсөн юм. Харин өнөөдөр тэр хүүхдийг алаг үзэж, тэгэхдээ ялгадас гэх мэт тааламжгүй үг хэрэглэсэн нь хэтэрсэн хэрэг байлаа.
Сэтгэгдэл (0)
Сэтгэгдэл бичигдээгүй байна