Жил бүр уншигчдын хүлээдэг Номын баяр “Илүү их уншъя” уриатайгаар Сүхбаатарын талбайд хоёр дахь өдрөө үргэлжлилж байна. Зохиолч, уншигчдыг “уулзуулж, номын баялаг ертөнцөөр нэг дороос танилцуулах боломж олгодог энэ арга хэмжээг зорьж очигсод жил ирэх тусамж олширч байгаа нь таатай хэрэг.
Улсын Их Хурлын дарга Г.Занданшатар Номын баярын нээлтийн үеэр Монгол төрийн түүхийг илтгэх 45.000 гаруй ном, бүтээлийн сан хөмрөг бүхий Парламентын номын санг удахгүй уншигч, олон нийтэд нээлттэй болгохоор ажиллаж буй талаар дурдав. 1924 оны Анхдугаар Үндсэн хуулийг баталсан хурлын тэмдэглэл, нэрт академич Б.Ринчен гуайн докторын зэрэг хамгаалсан судалгааны бүтээлээс эхлээд түүх, бичиг соёлын хосгүй эх сурвалжууд тус номын санд хадгалагдаж буйг тодотгосон юм.
Энэ жилийн “Шилдэг ном” шагналаар зохиолч, яруу найрагч М.Эрдэнэбатын “Орчлон хэнээр ч дутаагүй” ном , “Шилдэг хэвлэлийн газар”-аар “Непко паблишинг”, “Шилдэг номын сан” шагналыг Чингэлтэй дүүргийн хүүхэд хөгжлийн цогцолборын хамт олон тус тус хүртлээ.
Номын баяр зөвхөн үндэсний хэмжээгээр хязгаарлагдахаа больж, гадаадын орнуудаас нэр хүндтэй, алдартай зохиолч, хэвлэн нийтлэгчид ирж оролцдог болсноор Монголын уншигчид, хэвлэлийн компаниуд, зохиолчидтой биечлэн уулзаж хамтран ажиллах боломж бүрдэж байна.
Гучин тав дахь удаагийн номын баярт Andrew Nurenberg Associates болон Introtema компаниудын төлөөлөгчид “Номын соёлт ертөнц” ТББ-аас гаргасан нөхөрлөлийн хөтөлбөрийн хүрээнд хүрэлцэн ирж, манай хэвлэн нийтлэгчидтэй уулзаж, Монголын номын зах зээлийг дэлхий дахинд таниулах, гадаадын номын үзэсгэлэн яармагт оролцохгүйгээр номын зохиогчийн эрх авах, монгол зохиолчид өөрсдийн бүтээлийг гадаадын хэвлэлийн газруудад санал болгох боломжийг бүрдүүлэх боломж олгож байна. Номын баярт 200 гаруй хэвлэн нийтлэгч, 300 гаруй зохиолч тогтмол оролцдог, 250 мянган хүн зорин ирдэг гэсэн үзүүлэлт бий.
Сэтгэгдэл (0)
Сэтгэгдэл бичигдээгүй байна