Монгол Улсын дээд боловсролын сургалтын байгууллагад элсэн суралцагчдын эх хэлний боловсролын чанар, хэрэглээ, иргэдийн харилцааны соёл, эх хэлний дархлааны түвшин тогтоох Монгол хэл бичгийн шалгалт улсын хэмжээнд өнөөдөр буюу 4 дүгээр сарын 6-ны өдөр болов. Энэ удаагийн Монгол хэл бичгийн элсэлтийн шалгалтад 35680 хүүхэд оролцохоор бүртгүүлсэн байна. Тэдний 15783 нь эрэгтэй, 19897 нь эмэгтэй байна.
Элсэлтийн шалгалтыг уншаад ойлгох, эх зохион бичих чадвар тус бүр 20 оноо, зөв бичих, монгол бичгээр унших чадвар тус бүр 5 оноо, нийт 50 оноогоор дүгнэж, түүнээ 800 хүртэл оноонд хувирган тооцно. Монгол хэл бичгийн шалгалтын босго оноо 400 байх бөгөөд эх хэлний шалгалтад тэнцэхгүй бол дараагийн бусад элсэлтийн шалгалтыг өгч болох хэдий ч дотоодын их дээд сургуульд элсэн суралцах боломжгүй.
Манай хүүхдүүдийн монгол хэлний түвшин ямар байгаа вэ? Сүүлийн жилийн шалгалтын статистикийг харвал өнгөрсөн онд монгол хэл бичгийн эхний элсэлтийн шалгалтаар 30879 шалгуулагчаас 26017 нь тэнцэж, нийт оролцогчийн 15 хувь буюу 4862 нь шалгалтад тэнцээгүй. Монгол хэл бичгийн ЭЕШ-д 2023 онд улсын хэмжээнд 36 хүүхэд 800 оноо авснаас Баянзүрх дүүрэгт 6, Хөвсгөл аймаг, Чингэлтэй, Хан-Уул дүүрэгт тус бүр 4, Дорноговь, Орхон, Сэлэнгэ, Төв аймаг, Сүхбаатар дүүрэгт тус бүр 2, Архангай, Баянхонгор, Ховд, Хэнтий, Өвөрхангай аймгууд болон Баянгол, Сонгинохайрхан, Налайх дүүрэгт тус бүр 1 суралцагч 800 оноотой шалгагдсан байна.
Сэтгэгдэл (0)
Сэтгэгдэл бичигдээгүй байна