Ж.ЧИНБҮРЭН САЙД УВС АЙМАГТ АЖИЛЛАХДАА ЭЛЭГ ТАЙРАХ ХАГАЛГААНД ЗӨВЛӨХ ЭМЧЭЭР ОРОЛЦЖЭЭ

Эрүүл мэндийн сайд Ж.Чинбүрэн Увс аймагт 2026 оны гуравдугаар сарын 9-нд ажиллах үеэрээ элэг тайрах хагалгаанд зөвлөх эмчээр оролцжээ.

Тэрбээр энэ талаар өөрийн цахим хуудастаа бичсэн байна. 

Ж.Чинбүрэн "Увс аймагт томилолтоор ажиллахдаа элэгний хавдартай иргэний элэгний гуравны нэгийг тайрах мэс засал хийлээ. Ингэхдээ Глиссон аргаар хавдрыг бүрэн авах анатомийн тайралт заасан юм. Глиссоны аргын гол давуу тал нь

• Цус алдалт бага
• Мэс заслын хугацаа богино
• Хавдрыг анатомийн дагуу яг таг авах боломжтой
• Эмнэлэгт хэвтэх хугацаа бага байдгаараа онцлогтой байдаг.

Гурван өдрийн өмнө ийм хагалгааны аргаар элэгнийхээ гуравны нэгийг тайруулсан эмчлүүлэгчийн маань бие сайжирч, маргааш энгийн тасагт шилжихээр байгааг Увс аймгийн Нэгдсэн эмнэлгээс ярьж дуулгалаа, сайхан байна.

Хавдар судлалын үндэсний төвд залуухан эмч байхдаа Нарантуул захаас оёдлын утас авч спиртэнд гурав хонуулаад хагалгаагаа оёдог байсан үе надад байлаа. Харин өнөөдөр Монгол орон даяар элэгний хавдрыг бүх төрлийн аргаар (элэг тайрах, түлэх, бай эмчилгээ, хими эмчилгээ ) эмчилдэг байх хөгжил эрчимтэй явагдаж байна. Маш олон шавь нар маань аймгийн Нэгдсэн эмнэлгүүдэд мэргэшиж, манлайлан ажиллаж буйтай таарлаа. Та нартаа амжилт хүсье. Мэс заслын эмч хүн мэс заслын өрөөндөө хүн эмчлэхээр хутга барихдаа юунд ч эргэлздэггүй шиг та нарын маань хүсэл эрмэлзлэл, мэдлэг чадвар, тууштай байдал маш олон хүнийг аварч элэг бүтэн амьдралыг авч үлдэнэ гэдэгт багш нь эргэлзэхгүй байна, амжилт хүсье.

Элэгний хавдар бол шалтгаан нь маш тодорхой цөөхөн хавдрын нэг. В,С,Д вирусгүй л бол та элэгний хавдраар өвдөхгүй. Тийм учраас вирустэй эсэхээ заавал шалгуул, шинжилгээ өг. Таны цагийг үрэхгүй, хялбар, түгээмэл хийдэг шинжилгээ. Гагцхүү өөрийн эрүүл мэнддээ та хариуцлагатай ханд. Архины хэрэглээгээ хяна, элэгний өөхлөлтийг эмчил, хэвийн жинтэй бай. Ингэхэд л та элэгний хавдраар өвдөхгүй юм.

Та бүхэндээ эрүүл энх, элэг бүтэн амьдралыг ерөөе." гэсэн байна.