Төрийн албаны тухай хуулийн 66 дугаар зүйлийн 66.1.4-т заасан бүрэн эрхийн хүрээнд Төрийн албаны зөвлөлийн 2025 оны 207 дугаар тогтоолоор “Хүний нөөцийн аудитын сэдэв, төлөвлөгөө”-г баталсны дагуу “Хүний нөөцийн чадахуйн зарчмын хэрэгжилт, үр дүн” сэдвийн хүрээнд яамдын үйл ажиллагаанд хүний нөөцийн аудит хийх удирдамжийг баталж, аудитын нээлтийн хурлыг зохион байгууллаа. Хуралд Төрийн албаны зөвлөлийн гишүүн Б.Пүрэвдагва, яамдын Төрийн нарийн бичгийн дарга нар болон ажлын албаны албан хаагчид оролцов.
Төрийн албаны тухай хуулиар чадахуйн зарчмын хэрэгжилтэд хүний нөөцийн аудит хийхээр заасан байдаг. Үүний дагуу Төрийн албаны зөвлөлөөс 2021 оны гуравдугаар сард “Төрийн байгууллагын үйл ажиллагаанд хүний нөөцийн аудит хийх журам”-ыг батлан мөрдөж эхэлснээр аудит явуулах эрх зүйн орчин бүрдсэн юм.
Энэ удаагийн “Хүний нөөцийн чадахуйн зарчмын хэрэгжилт, үр дүн” сэдэвт аудитын зорилго нь Төрийн захиргааны төв байгууллагуудын хүний нөөцийн бодлого, үйл ажиллагаа нь холбогдох хууль тогтоомж болон чадахуйн зарчим (мерит)-д нийцэж байгаа эсэхийг үнэлэх, баталгаажуулахад оршино. Түүнчлэн бодит нотолгоонд үндэслэн дүгнэлт, зөвлөмж гаргаж, хэрэгжилтийг хангахад чиглэж байна.
Аудитын багийг Төрийн албаны зөвлөлийн гишүүн Б.Пүрэвдагва ахалж, гишүүдээр Төрийн албаны зөвлөлийн Ажлын албаны Хүний нөөцийн удирдлага, аудитын газрын дарга С.Нямбаяр болон газрын албан хаагчид ажиллах юм.
Эх сурвалж: Төрийн албаны зөвлөл
Сэтгэгдэл (0)
Сэтгэгдэл бичигдээгүй байна