Монгол Улсын Батлан хамгаалах яамнаас энэ оныг “Эх оронч Монгол-Их сэргэлтийн жил” болгон зарлаж, нийт 17 зорилтын хүрээнд 150 арга хэмжээг хэрэгжүүлэхээр төлөвлөсөн. Энэ хүрээнд өнөөдөр /2025.04.21/ нэгдүгээр улиралд салбарын хэмжээнд хэрэгжүүлсэн ажлын гүйцэтгэлээ дүгнэж, цаашид хэрэгжүүлэх ажлын төлөвлөлтөө хэлэлцжээ.
2025 оны нэгдүгээр улиралд хийж хэрэгжүүлсэн онцлох ажлуудыг дурдвал
- 2025 оны нэгдүгээр сарын 1-ний өдрөөс эхлэн Зэвсэгт хүчин, хилийн цэргийн алба хаагчид онцгой нөхцөлийн нэмэгдлээ гар дээрээ авч эхэлсэн.
- Монгол Улсад баригдах сумны үйлдвэрийн ажлыг эрчимжүүлжээ.
- Зэвсэгт хүчин болон хил хамгаалах байгууллагын офицер, ахлагч, цэргийн гэрээт албан хаагчдын мэргэшлийн зэргийн нэмэгдлийг шинэчлэн тогтоосон.
- Дэлхийн халуун цэг Өмнөд Судан улсад үүрэг гүйцэтгэж байгаа энхийг сахиулагчидтайгаа уулзаж, ажиллагааны газар оронтой биечлэн танилцахын зэрэгцээ тулгамдсан асуудлуудыг шийдвэрлэсэн.
- НҮБ-ын тусгай төлөөлөгчтэй уулзаж, энхийг сахиулагчдын оролцоог нэмэгдүүлэх асуудлаар санал солилцсон.
- “Оюутан цэрэг”-т цэргийн мэргэжил олгох сургалтад их дээд, коллежийн 2 болон 3 дугаар ангийн оюутан хамрагдах боломжийг нээв.
- Цэргийн төв эмнэлгийн эмч, мэргэжилтнүүд бөөр шилжүүлэн суулгах хагалгааг амжилттай хийлээ.
- Үндэсний сөрөн тэсвэрлэх чадавхыг бэхжүүлэх стратеги боловсруулах ажлыг эхлүүлсэн.
- Хугацаат цэргийн алба хаагчид алба хаах нэг жилийн хугацаандаа англи хэл, монгол бичиг, компьютер, жолооны сургалтад хамрагдах бодлогыг амжилттай хэрэгжүүлж эхэлсэн.
- АНУ-ын Аляск, Хавай мужид ажлын айлчлал хийж энхийг сахиулах ажиллагаанд шаардлагатай машин техник авах, ахлагч бүрэлдэхүүнийг сургах асуудлыг шийдвэрлэв.
- Батлан хамгаалах, Зэвсэгт хүчний салбар хоёр гавьяат, нэг хошууч генерал, дөрвөн бригадын генералаар бүл нэмсэн байна.
Цаашид Батлан хамгаалах салбар эх оронч үзлийг түгээн дэлгэрүүлэх, үндэсний сөрөн тэсвэрлэх чадавхыг нэмэгдүүлэх гал голомт нь байхад онцгой анхаарна. Өргөтгөсөн шуурхай хурлаар удахгүй эхлэх хугацаат цэрэг татлагын ажлын бэлтгэлийг сайтар хангаж, цэргийн насны залуусын эрүүл мэндийн үзлэгийг чанартай, хариуцлагатай явуулахыг сануулсан байна.
Энэ чиглэлээр Батлан хамгаалах сэргэлтийг хурдтай хэрэгжүүлэх үүрэг чиглэлийг БХЯ, ЗХЖШ, нэгтгэл ангиудын удирдлага, нийслэл, аймаг , дүүргийн Цэргийн штабын удирдах бүрэлдэхүүнд үүрэг болгожээ.
Сэтгэгдэл (0)
Сэтгэгдэл бичигдээгүй байна