Алтай таван богдоос гүйлтээ эхлүүлсэн Зэвсэгт хүчний 123 дугаар ангийн хөгжимчин ахлах ахлагч Э.Даваажамц, Зэвсэгт хүчний 234 дүгээр ангийн гүүрчин аврагч дэд ахлагч Б.Буянхишиг нар 18 дахь хоног дээрээ өндөр Алтайд очжээ.
Тэд гурван аймгийн нутаг дэвсгэрийг дамжин 792 км замыг туулан Алтай хотод ирсэн бөгөөд гүйгчдийг хурандаа Б.Дорждэрэм захирагчтай Зэвсэгт хүчний 341 дүгээр ангийн хамт олон, Говь-Алтай аймгийн ЗДТГ-ын Цэргийн штаб, дотоодын цэрэг, онцгой байдал, шүүхийн шийдвэр гүйцэтгэх байгууллагын алба хаагчид угтан авч, "Алтай" чуулгын уран бүтээлчид ая дуугаар бэлэг барьсан байна.
Ахлах ахлагч Э.Даваажамц, дэд ахлагч Б.Буянхишиг нар баруун захын цэг Алтай таван Богдоос зүүн захын цэг Дорнод аймагт байрлах Соёлз уулын Модот хамар хүртэл 11 аймгийн 40 сумын нутаг дэвсгэрээр 3280 км замыг 63 хоногт, хойд захын цэг Хөвсгөл аймагт байрлах Монгол шарын даваанаас өмнөд захын цэг Өмнөговь аймгийн Орвог гашууны Бор толгой хүртэл 5 аймгийн 23 сумын нутаг дэвсгэрээр 1720 км замыг 36 хоногт тус тус туулж дуусгахаар төлөвлөөд байгаа юм.
Сэтгэгдэл (0)
Сэтгэгдэл бичигдээгүй байна