Монгол Улсад Гэмт хэргээс урьдчилан сэргийлэх ажлыг зохицуулах зөвлөлийн Ажлын албанаас “Хүний эрхийн мэдрэмжтэй мэдээлэх нь” сэтгүүлчдэд зориулсан сургалт зохион байгуулжээ.
Жилд хоёр удаа уламжлал болгон зохион байгуулдаг уг сургалтад энэ удаад хэвлэл мэдээллийн 30 орчим байгууллагын сэтгүүлчид хамрагдсан байна.
"Хүний эрхийн мэдрэмжтэй мэдээлэх нь” сургалтын гол зорилго нь сэтгүүлчдийн хүний эрхийн мэдлэг ойлголтыг дээшлүүлэх, гэмт хэрэг, зөрчлийн талаарх мэдээ мэдээллийг боловсруулж түгээхдээ энэ талын мэдрэмжтэй хандах ур чадвар эзэмшүүлэхэд оршдог.
Ажлын албаны дарга Л.Нямгэрэл сургалтыг нээж хэлсэн үгэндээ "Мэдлэг, мэдээлэлтэй сэтгүүлчийн хөдөлмөрөөр нийгэмд олон эерэг үр нөлөө гардаг ч мэдлэггүй хэрнээ мэдэмхий сэтгүүлчийн үйл ажиллагаанаас үүдэн гарах үр дагавар, хохирогчийг дахин хохироох ч нөхцөл байдал үүсдэг. Нэг удаагийн сургалтаар сэтгүүлчдэдээ бүх талын мэдлэг олгох боломжгүй ч Гэмт хэргээс урьдчилан сэргийлэх ажлыг зохицуулах зөвлөлийн чиг үүргийн хүрээнд тогтмол мэдлэг, ойлголтыг нь тэлж байх нь бидний зорилго юм шүү" гэж онцолжээ.
Сургалтын үеэр Цагдаагийн байгууллагаас гэмт хэрэг, зөрчлийн талаар олон нийтэд мэдээлэхдээ хүний эрх, эрх чөлөөг хангаж хамгаалах чиглэлд баримталж буй бодлоготой танилцахын зэрэгцээ УИХ-ын энэ хаврын чуулганаар хэлэлцэх Хүний эрхийн багц хуулийн төслөөр хэлэлцүүлэг өрнүүлснээрээ онцлог байв.
Тус сургалтад сургагч багшаар Жендэрийн зөвлөх, “Хүн тулгуурт хөгжил” ТББ-ын тэргүүн Б.Оюун, Хүний эрхийн үндэсний комиссын референт О.Тодбулаг, ХЗДХЯ-ны Хууль зүйн бодлогын газрын шинжээч О.Мандах, ЦЕГ-ын Урьдчилан сэргийлэх албаны Дэд бөгөөд Захиргааны удирдлагын хэлтсийн дарга, цагдаагийн дэд хурандаа Г.Мөнхбаяр, ГХУСАЗЗАА-ны Гэмт хэргээс урьдчилан сэргийлэх ажлыг зохицуулах хэлтсийн дарга Б.Одмандах нар ажиллажээ.
Сэтгэгдэл (0)
Сэтгэгдэл бичигдээгүй байна