Зэвсэгт хүчний Хуурай замын цэргийн нэгтгэл, ангийн хугацаат цэргийн алба хаагчид “Мотобуудлага, тагнуул, төрөл мэргэжлийн шилдэг бүлэг, тоот” шалгаруулах тэмцээний үеэр олон бахдам амжилтыг үзүүлжээ.
Зэвсэг хүчний Хуурай замын 10 нэгтгэл, ангийн хугацаат цэргийн алба хаагчид буудлага, маршийн гүйлт, норматив, саадын зурвас, инженер, хими гээд олон төрөлд онцгой амжилт үзүүлж, онжавуудын бахархал болон гялалзсан байна.
Саяхан ахлах байлдагч болон түрүүч хоёр галын бэлтгэлийн магазин сумлах нормативыг 17, 22 болгож бууруулсан. Харин Зэвсэгт хүчний 327 дугаар ангийн алба хаагч ахлах байлдагч Г.Баянжаргал автоматын задаргааны нормативыг 5-хан секунд болгож чаджээ. Г.Баянжаргал нь ангидаа бэлтгэл сургалтын үеэр 4-5 секундэд гүйцэтгэснээ онцолж, тэмцээний үеийн автомат хатуу байсныг ч дурдсан байна. Галын бэлтгэлийн автоматын задаргааны нормативыг 12 секундэд амжиж гүйцэтгэвэл “Онц” дүнгээр тооцогддог юм.
Г.Баянжаргал цэргийн албанд ирэхээс өмнө “Амгалан өртөө” төмөр замын байгууллагад гагнуурчин хийдэг байсан, халагдаад ахлагчаар улирахаар төлөвлөж байгаа аж.
Хуурай замын цэргийн Ахлагчийн хөгжлийн төвийн сургалтаар дамжуулан мөрдэстэй алба хаагч болоод “Талын чоно”-доо үүрэг гүйцэтгэх нь түүний ойрын зорилго юм.
Ахлах байлдагч Г.Баянжаргал Хуурай замын цэргийн нэгдсэн тактикийн хээрийн сургуульд оролцсоноор хамгийн дотнын андуудтайгаа ч таарсан. Арван жилийнх нь найзууд Зэвсэгт хүчний 119, 326 дугаар ангиудад алба хааж байгаа, энэ сургууль намайг олон онжавуудтай болгож, мартагдашгүй сайхан дурсамжийг бүтээж, бас автоматын задаргаанд өөрийн амжилтаа дархлахад тусалж байна гэжээ.
Эх сурвалж: Зэвсэгт хүчний жанжин штаб
Сэтгэгдэл (0)
Сэтгэгдэл бичигдээгүй байна