Аж үйлдвэр, эрдэс баялгийн яам БНСУ-ын Худалдаа, аж үйлдвэр, эрчим хүчний яам хамтран БНСУ-ын Засгийн газрын хөгжлийн албан ёсны тусламжийн санхүүжилтээр 2023 оноос хэрэгжүүлж байгаа ховор металлд нэмүү өртөг шингээх, эргэлтэд оруулахад дэмжлэг үзүүлэхэд чиглэсэн “Монгол-Солонгосын хамтарсан ховор металлын судалгааны төв” байгуулах хамтын ажиллагааны хоёрдугаар хурал 2025 оны 3 дугаар сарын 12-16-ны өдрүүдэд Сөүл хотноо зохион байгууллагджээ.
Хамтарсан хорооны хурлыг Аж үйлдвэр, эрдэс баялгийн яамны Төрийн нарийн бичгийн дарга С.Жавхланбаатар, БНСУ-ынХудалдаа, аж үйлдвэр, эрчим хүчний дэд сайд Lee Hohyeon нар даргалав.
Хамтарсан хорооны хурлаар “Монгол-Солонгосын хамтарсан ховор металлын судалгааны төв” байгуулах төслийн ажлын явц, “Геологийн судалгаа-шинжилгээний төв” ТӨҮГ, Солонгосын КИГАМ байгууллагын хамтран хэрэгжүүлж байгаа геологийн судалгааны ажлын өнөөгийн нөхцөл, ололт амжилт болон бусад асуудлын талаар харилцан мэдээлэл хийжээ.
Цаашид ховор металлын судалгааны төвийн тоног төхөөрөмжийг тавдугаар сард багтаан суурилуулж, үйл ажиллагааг 2025 оны 6 дугаар сард нээх, төвийн үйл ажиллагаагаар дамжуулан эрдэс баялгийн салбар дахь хоёр орны аж хамтын ажиллагаанд дэмжлэг үзүүлэх асуудлаар санал солилцсон байна.
Төрийн нарийн бичгийн дарга С.Жавхланбаатар “Монгол-Солонгосын хамтарсан ховор металлын судалгааны төв” байгуулах төсөл нь Монгол Улсын Засгийн газрын зүгээс баримталж буй уул уурхайн олборлолтоос нэмүү өртөг шингээсэн бүтээгдэхүүн үйлдвэрлэж, дэлхийн зах зээлд нийлүүлэх бодлогод нийцэж байгааг дурдаад үр дүнтэй хэрэгжилтийг хангахыг цохон тэмдэглэжээ.
Сэтгэгдэл (0)
Сэтгэгдэл бичигдээгүй байна