УИХ-ын Аж үйлдвэржилтийн бодлогын байнгын хорооны гишүүд Аж үйлдвэр, эрдэс баялгийн яаманд ажиллаж, Аж үйлдвэрийн паркийн бодлогын асуудал, үйл ажиллагааны явцын талаар мэдээлэл сонсож, санал солилцжээ..
Аж үйлдвэр, эрдэс баялгийн сайд Ц.Туваан төрөөс үйлдвэрлэл, технологийн паркийн талаар баримталж буй бодлого, түүний хэрэгжилтийн талаар танилцуулсан байна.
Мөн “Эрдэнэс Монгол” ХХК-ийн дэргэдэх “Эрдэнэс” үйлдвэрлэл, технологийн паркийн хэрэгжүүлж буй төрийн өмчит үйлдвэрлэл, технологийн зургаан паркийн танилцуулга, хувийн өмчит үйлдвэрлэл, технологийн парк болох Дорноговь аймгийн Алтанширээ сумын нутагт хэрэгжиж буй “Алтан ширээт” үйлдвэрлэл, технологийн парк, орон нутгийн өмчит үйлдвэрлэл, технологийн парк болох Налайхын барилгын материалын үйлдвэрлэл, технологийн паркийн төлөөллүүд өөрсдийн үйл ажиллагаа, бүтээн байгуулалтын явцын талаар танилцуулга хийжээ.
Монгол Улсын Засгийн газрын 2024-2028 оны үйл ажиллагааны хөтөлбөрт 14 мега төслийг хэрэгжүүлэхээр тусгасны долоо нь Аж үйлдвэр, эрдэс баялгийн яаманд хамаарч байгаа юм.
Засгийн газрын хуралдаанаар хөтөлбөрт тусгагдсан нүүрс-хими, кокс-химийн цогцолбор, гангийн цогцолбор, зэс боловсруулах цогцолборын байршлыг тогтоож, төслийн ажлыг эрчимжүүлэх албан даалгаврыг гаргасан.
Улс орны нийгэм, эдийн засгийг хөгжүүлэх, импортыг орлох бүтээгдэхүүн үйлдвэрлэх, эдийн засгийн өрсөлдөх чадварыг дээшлүүлэх, үндэсний хэмжээний төсөл, хөтөлбөрийг хэрэгжүүлэхэд Аж үйлдвэрийн паркийн үйл ажиллагааг эрчимжүүлэх шаардлагатай гэдгийг байнгын хорооны гишүүд онцолж, цаашдаа харилцан уялдаа холбоогоо сайжруулж, үүсээд байгаа хүндрэл бэрхшээлийг хамтран шийдвэрлэх, нэгдсэн бодлого, удирдлага чиглэлээр хангаж, дэмжиж хамтран ажиллах болно гэсэн байна.
Сэтгэгдэл (0)
Сэтгэгдэл бичигдээгүй байна