Төрийн цахим үйлчилгээний зохицуулалтын газар “Жижиг, дунд үйлдвэрийн газар”-аас хүн, хуулийн этгээдэд үзүүлж буй төрийн үйлчилгээнд процессын дахин инженерчлэл хийж, энэ ажлын үр дүнд гарсан хамтарсан тайланг танилцуулах уулзалтыг зохион байгуулжээ.
Энэхүү процессын дахин инженерчлэлийг 2024 оны дөрөвдүгээр сараас эхлэн “Шинэ сэргэлтийн бодлогын хурдасгуур төв” ТӨҮГ болон “Систем Арт Венчурс” ХХК-тай хамтран хийсэн байна.
Уулзалтад Төрийн цахим үйлчилгээний зохицуулалтын газрын дарга П.Батбаатар, Жижиг, дунд үйлдвэрийн газрын дарга Я.Эрдэнэсайхан, “Систем Арт Венчурс” ХХК-ний ахлах зөвлөх Ц.Мөнхтуяа, мөн бусад холбогдох албаны хүмүүс оролцож, тус тайлангийн агуулга, үр дүн, цаашдын арга хэмжээний талаар дэлгэрэнгүй санал солилцжээ.
Процессын дахин инженерчлэл нь төрийн үйлчилгээний чанарыг сайжруулах, үйл ажиллагааг хялбаршуулах, иргэд, аж ахуйн нэгжүүдэд илүү хурдтай, үр дүнтэй үйлчилгээ хүргэх зорилготой юм.
Хамтарсан тайланд “Жижиг, дунд үйлдвэрийн газар”-ын үйлчилгээнд тулгарч байсан үндсэн асуудлуудыг нарийвчлан судалж, тэдгээрийн шийдлүүдийг тодорхойлсон нь тус байгууллагын үйл ажиллагааны бүтээмжийг нэмэгдүүлэх, үйлчлүүлэгчдэд үзүүлэх үйлчилгээг илүү нээлттэй, хурдтай, таатай болгоход туслах ач холбогдолтой гэж Жижиг, дунд үйлдвэрийн газрын дарга Я.Эрдэнэсайхан онцлон хэлсэн байна.
Сэтгэгдэл (0)
Сэтгэгдэл бичигдээгүй байна