14 МЕГА ТӨСЛИЙН 7 НЬ АЖ ҮЙЛДВЭР, ЭРДЭС БАЯЛГИЙН ЯАМНЫ ЧИГ ҮҮРЭГТ ХАМААРЧ БАЙНА

Аж үйлдвэр, эрдэс баялгийн яамнаас Хамтарсан Засгийн газрын үйл ажиллагааны хөтөлбөр батлагдсанаас хойш хийж хэрэгжүүлсэн онцлог ажлуудаа танилцуулжээ. 

Тус яам нь Монгол Улсын геологи, уул уурхай, газрын тос, боловсруулах үйлдвэрийн бодлого үйл ажиллагаагаа улам эрчимжүүлж, ил тод, хариуцлагатай уул уурхайг хөгжүүлэх, боловсруулах үйлдвэрлэл эрхлэгчийн үйл ажиллагааг дэмжих чиглэлээр анхаарч ажилласан юм. 

Монгол Улсын Засгийн газар эрдэс баялгийн салбарын хөрөнгө оруулалтыг нэмэгдүүлж, дэвшилтэт техник, технологид суурилсан, уул уурхайн бүтээгдэхүүний хэмжээг нэмэгдүүлэх, нэмүү өртөг шингэсэн аж үйлдвэрлэлийг хөгжүүлж, дотоодын бүтээн байгуулалтын хэрэгцээг хангаж, экспортыг нэмэгдүүлэх зорилгоор 14 мега төслийг хэрэгжүүлэх зорилт тавьж буй. “Монгол Улсын Засгийн газрын 2024-2028 оны үйл ажиллагааны хөтөлбөр”-т тусгагдсан эдгээр 14 мега төслийн 7 нь Аж үйлдвэр, эрдэс баялгийн яамны чиг үүрэгт хамаарч байгаа юм.

• Монгол Улсын Их Хурлын 2024 оны 11 дүгээр сарын 21-ний өдрийн нэгдсэн чуулганы хуралдаанаар “Цөмийн энергийн тухай хуульд нэмэлт өөрчлөлт оруулах хууль”-ийг батлуулав.
• Монгол Улс, Франц улс хамтран “Зөөвч овоо” төслийг ашиглах Хөрөнгө оруулалтын гэрээний төсөлтэй холбогдох тогтоолын төслийг Улсын Их Хуралд өргөн бариад байна.
• Засгийн газраас 14 мега төслийн нэгдүгээрт эрэмбэлэгдсэн Монгол Улсын Засгийн газар, БНХАУ-ын Засгийн газар хоорондын Гашуунсухайт-Ганцмод төмөр замыг холбох бүтээн байгуулалтын гэрээ байгуулахад баримтлах үндсэн чиглэлийн төслийг УИХ-д өргөн бариад байна.
• Конвенци, конвенцийн нэмэлт, өөрчлөлт, протоколыг соёрхон батлах тухай хуулийн төслүүдийг батлуулав.
• Монгол Улсын Их Хурлын нэгдсэн чуулганаар Бага хэмжээний цөмийн материалын шинэчилсэн протоколыг соёрхон батлах тухай, Цөмийн аюулгүй ажиллагааны тухай конвенцыг соёрхон батлах тухай, Цөмийн материалыг биечлэн хамгаалах тухай 1980 оны конвенцын 2005 оны нэмэлт, өөрчлөлтийг соёрхон батлах тухай хуулийн төслүүдийг хэлэлцүүлж батлуулав.
• Шинэчлэн байгуулагдсан Засгийн газраас аж үйлдвэржилтийн төслүүдийг дэмжих бодлого баримталж байгаатай холбоотойгоор “Ашигт малтмалын эцсийн бүтээгдэхүүний жагсаалт”-д баяжуулсан нүүрсийг хамруулах тухай Засгийн газрын тогтоолын төслийг хэлэлцүүлж батлууллаа. Ингэснээр ашигт малтмалыг түүхийгээр нь бус баяжуулж, боловсруулан экпортлож буй аж ахуйн нэгжүүдийн дотоодын худалдан авалтад ногдуулсан нэмэгдсэн өртгийн албан татварыг тэг хувиар тооцох боломж бүрдсэн.

  

Газрын тосны хайгуулын чиглэлээр хийгдсэн ажлууд

Засгийн газрын хуралдаанаар газрын тос, уламжлалт бус газрын тосны хайгуулын 6 талбайд шинээр бүтээгдэхүүн хуваах гэрээ байгуулахаар шийдвэрлүүллээ. Ингэснээр дотоодын түүхий эдэд тулгуурласан газрын тос боловсруулах үйлдвэрийг түүхий эдээр хангах ажлын хүрээнд газрын тосны хайгуулын 4 талбай, нүүрсний давхаргын метан хийн хайгуулын 2 талбайд хайгуулын 8 жилийн хугацаанд нийт 129,4 сая ам.долларын хөрөнгө оруулалт хийгдэх юм.

• Газрын тосны ашиглалтын "Матад-ХХ" талбайд 2024 оны 10 сарын 25-ны өдөр газрын тосны олборлолтын ажлыг эхлүүлэв. Ингэснээр Монгол Улс газрын тосны 4 дэх ордыг ашиглалтад хүлээн авч олборлолтын хэмжээг нэмэгдүүлэх нөхцөл бүрдсэн.
• Монгол Улсын Засгийн газрын тогтоолоор “Газрын тосны бүтээгдэхүүн нийлүүлэх салбарт хамтран ажиллах тухай” Монгол Улсын Засгийн газар болон Оросын Холбооны Улсын Засгийн газар хоорондын хэлэлцээрийг хэлэлцэн баталсан.