ЗАСГИЙН ГАЗРЫН ХЯНАЛТ ХЭРЭГЖҮҮЛЭХ ГАЗРААС ХЭНТИЙ АЙМАГТ СУРГАЛТ, ХЭЛЭЛЦҮҮЛЭГ ЗОХИОН БАЙГУУЛЖЭЭ

Засгийн газрын Хяналт хэрэгжүүлэх газар, Хэнтий аймгийн Засаг даргын тамгын газар хамтран төрийн албан хаагчдад зориулсан сургалт, хэлэлцүүлгийг зохион байгуулжээ.

Сургалтын үйл ажиллагааг аймгийн Засаг дарга Д.Аюурбунь нээж үг хэлсэн бол Засгийн газрын Хяналт хэрэгжүүлэх газрын Хяналт шалгалтын багийн хянан шалгагч, Ахлах референт П.Эрдэнэбилэг байгууллагынхаа үйл ажиллагааны чиглэл, бүтэц, хэрэгжүүлж буй ажлуудын талаар танилцуулсан байна. 

Сургалтын зорилго нь Монгол Улсын хөгжлийн бодлогын баримт бичгийн хэрэгжилт, төрийн захиргааны байгууллагын үйл ажиллагаанд үнэлгээ, мониторинг хийх арга хэлбэрийг өөрчлөх, эрх зүйн орчныг боловсронгуй болгох, үр дүнд суурилсан үнэлгээ, мониторингийн тогтолцоог хөгжүүлэхээр шинэчлэн найруулсан журмын төслийг танилцуулахад чиглэж байна.

Энэ удаагийн сургалт, хэлэлцүүлэгт Хэнтий аймагт үйл ажиллагаа явуулж буй төрийн байгууллагын удирдлага, ажилтан, албан хаагчдын төлөөлөл 180 гаруй хүн хамрагдснаас танхимаар 80, цахимаар 100 гаруй хүн хамрагджээ.

Сургалтын хүрээнд

• Төрийн байгууллагын процессын дахин инженерчлэл 
• Иргэдээс төрийн байгууллага, албан тушаалтанд гаргасан өргөдөл, гомдлыг шийдвэрлэх, хуулийн хэрэгжилтийг хангаж ажиллах талаар зөвлөмж, анхаарах асуудал
• Үнэлгээ, мониторингийн талаарх олон улсын туршлага зэрэг сэдвийн хүрээнд мэдээлэл хийсэн аж.  

Мөн Үнэлгээ мониторингийн эрх зүйн орчин, тогтолцоо, шинэчлэлийн бодлогын талаар “Мониторинг хийх нийтлэг журам”, Үнэлгээ хийх нийтлэг журам”, Төрийн байгууллагын гүйцэтгэлийн удирдлагыг дүгнэх журам” зэрэг гурван журмын төслийн танилцуулгыг хийж санал авч байна.

Ингэснээр төрийн байгууллагын хариуцлагыг сайжруулах, шударга ёсыг сахиулах, төрийн үйлчилгээний хүртээмжтэй, ил тод байдлыг нэмэгдүүлэх боломж өргөжих юм.