Аж үйлдвэр, эрдэс баялгийн яамны Төрийн нарийн бичгийн дарга С.Жавхланбаатар Итали улсын Парламентын төлөөлөгчдийн танхимын гишүүн Никола Карэ, тус улсаас Монгол Улсад суугаа Элчин сайд Жованна Пикарэтта нарыг хүлээн авч уулзлаа.
Уулзалтын эхэнд Төрийн нарийн бичгийн дарга С.Жавхланбаатар Европын Холбооны гишүүн, Монгол Улсын гурав дахь хөрш болох Итали улстай аж үйлдвэр, эрдэс баялгийн салбарын хүний нөөцийн чадавхыг бэхжүүлэх, нэмүү өртөг шингэсэн үйлдвэрлэл хөгжүүлэх чиглэлээр салбарын яамны зүгээс бодлогоор дэмжин хамтран ажиллахад бэлэн байгаагаа илэрхийлэв.
Түүнчлэн Монгол Улсын Засгийн газраас аж үйлдвэр, эрдэс баялгийн салбарт баримталж буй бодлого чиглэл, Засгийн газрын 2024-2028 оны үйл ажиллагааны хөтөлбөрт аж үйлдвэр, эрдэс баялаг, уул уурхайн чиглэлээр тусгагдсан томоохон төслүүд тухайлбал, нүүрс, химийн үйлдвэр, зэс, гангийн үйлдвэр, газрын тос боловсруулах үйлдвэр, ураны төсөл болон эрдэс баялгийн салбарын эдийн засагт үзүүлэх хувь нэмэр, ашигт малтмалын нөөцийн талаар товч танилцуулсан юм.
Итали улсын Парламентын төлөөлөгчдийн танхимын гишүүн Никола Карэ тус улсын Леонардо компани Монгол Улсын Үндэсний геологийн албаны удирдлагуудтай уулзаж хамтран ажиллах боломжийн талаар санал солилцсоныг дурдаад манай улстай геологи хайгуулын чиглэлээр хамтран ажиллах, ялангуяа хиймэл дагуулын тусламжтайгаар агаараас геологийн хайгуул болон орд газруудад хяналт тавих, хүний нөөцийг бэхжүүлэх, компани хооронд холбоо тогтоож хамтран ажиллах, хамтын ажиллагааны баримт бичиг байгуулах сонирхолтой буйгаа илэрхийлжээ.
Сэтгэгдэл (0)
Сэтгэгдэл бичигдээгүй байна