Гэр бүл, хөдөлмөр, нийгмийн хамгааллын сайд Л.Энх-Амгалан хөгжлийн бэрхшээлтэй хүүхэдтэй эцэг эхчүүдийн эрхийг хамгаалах чиглэлээр үйл ажиллагаа явуулдаг “Эрхэм нандин сувд” ТББ-ын удирдлагуудтай уулзжээ.
Тус байгууллагаас санаачлан хөгжлийн бэрхшээлтэй хүүхдийн урьдчилан сэргийлэх үзлэгийг улсын хэмжээнд 2022 оноос эхлэн жилд хоёр удаа зохион байгуулдаг байна.
Уулзалтын үеэс яригдсан зарим зүйлээс онцолвол:
- 2025 оноос хүнд хэлбэрийн хөгжлийн бэрхшээлтэй хүүхдэд олгох тэтгэмжийг 30 хувиар нэмэгдүүлэхээр шийдвэрлэсэн.
- Цаашид хөгжлийн бэрхшээлтэй хүүхдүүдийн нийгмийн асуудлыг шийдвэрлэхдээ гал унртааж, аргацаах биш, тогтолцооны шинэчлэлтүүдийг үе шаттайгаар хийх зайлшгүй хэрэгцээ шаардлага байна.
- Хөдөлмөр засал, хөдөлгөөн засал, хэл засал, боловсрол, асран хамгаалагчдад зориулсан зөвлөгөө, дэмжлэг өгөх, аав ээжийг нь хүүхдээ харангаа хөдөлмөр эрхлэх боломжоор хангах зэрэг нийгмийн хамгааллын бүхий л үйлчилгээг үзүүлэх дэмжих төвүүдийг байгуулахаар улсын төсөвт тусгуулсан.
- Эцэг эхчүүдийн зүгээс нийгмийн үйлчилгээ, хүртээмжийг сайжруулах, гадаадад өртөг өндөртэй хийгдэж буй хагалгаа, эмчилгээг эх орондоо хийлгэх, сэргээн засах, нөхөн сэргээх үйлчилгээний чанар, хүртээмжийг сайжруулах хэрэгтэйг онцолсон.
- Халамжийн сунгалт, тусгай хэрэгсэл авах тодорхойлолт авахад хүнд суртал, чирэгдлийг арилгаж, боловсрол, эрүүл мэнд, хөдөлмөр, нийгмийн хамгааллын гурван салбарын уялдаа холбоог хангах хэрэгтэй.
- Мөн эрхзүйн орчныг сайжруулахаар Хөгжлийн бэрхшээлтэй хүний эрхийн тухай хуулийн шинэчилсэн найруулга, Саадгүй байдал, хүртээмжийн тухай хуулийн төслийг өргөн барихаар бэлдэж байна.
Сэтгэгдэл (0)
Сэтгэгдэл бичигдээгүй байна