ХУУЛЬ, ЭРХ ЗҮЙН ҮНЭГҮЙ ЗӨВЛӨГӨӨ ӨГӨХ ӨДӨРЛӨГ БОЛНО

2024 оны наймдугаар сарын 21-ний өдөр болох зарим үйл явдал:

-Монгол Улсын Ерөнхийлөгч Ухнаагийн Хүрэлсүхийн урилгаар Бүгд Найрамдах Словени Улсын Ерөнхийлөгч Др.Наташа Пирц Мусарын манай улсад хийж буй төрийн айлчлал үргэлжилнэ.

-УИХ-ын ээлжит бус чуулган хуралдана. 

-Засгийн газрын ээлжит хуралдаан Төрийн ордонд хуралдана.

9:00 цагт: МҮХАҮТ-д Монгол-Словений бизнес форум нээлтээ хийнэ.

-Бүгд Найрамдах Словени Улсын Элчин сайдын яамны дэмжлэгтэйгээр зохион байгуулж буй “Монголын ойн салбарын шинэчлэл” сургалт хоёр өдрөө Корпорейт зочид буудлын хурлын заал (16 давхарт)-нд үргэлжилнэ.

8:30-9:30 цагт: ЛГБТ иргэдийн эрүүл мэнд, хүний эрхийн талаар “Тэгш эрх”-ийн өдрүүд зохион байгуулах талаар “Youth LEAD Mongol” ТББ-ын байранд мэдээлэл хийнэ.

9:00-17:00 цагт: НЗДТГ-аас Монголын Хуульчдын холбоотой хамтран иргэдэд хууль, эрх зүйн үнэ төлбөргүй зөвлөгөө өгөх өдөрлөгийг зохион байгуулна. 

-Кембрижийн их сургууль, Монголын уран зургийн галерей хамтран зохион байгуулж буй АНУ-ын Индианагийн их сургуулийн профессор, урлаг судлаач Ц.Уранчимэгийн дэглэсэн “Цаг хугацаа ба орон зай” тусгай үзэсгэлэн Монголын уран зургийн галерейн үзэсгэлэнгийн их танхимд хаалтаа хийнэ.

-“Шинэ замнал” ТББ, Зүймэл даавуун урлалын төвийн 20 жилийн ойд зориулсан “Өлзий хээ” нүүдлийн үзэсгэлэн УИД-ийн 5 давхарт гарна. 

-Монгол Улс, ОХУ-ын Зэвсэгт хүчний хамтарсан “Сэлэнгэ’’ байлдааны буудлагатай тактикийн хээрийн сургууль Зэвсэгт хүчний 327 дугаар ангийн сургалтын төвийг түшиглэн хоёр үе шаттайгаар явагдана. 

-“Орбис” нүдний эмнэлгээс ЭХЭМҮТ, П.Н.Шастины нэрэмжит Улсын Гуравдугаар төв эмнэлэг болон орон нутагт ажиллаж буй нүдний эмч, сувилагч, мэдээгүйжүүлэгч эмч, эмнэлгийн тоног төхөөрөмжийн инженерүүдийн дунд явуулж буй сургалт үргэлжилнэ.

-Монгол-Германы хооронд дипломат харилцаа тогтоосны 50 жилийн ойн хүрээнд дэлгэсэн хоёр улсын 15 уран бүтээлчийн “2 day in Mongolia” үзэсгэлэн Г.Занабазарын нэрэмжит Дүрслэх урлагийн музейд олны хүртээл болно.                

-Халх голын ялалтын 85 жилийн ойд зориулсан “Халх гол-85 жил” үзэсгэлэн Чингис хаан Үндэсний музейд үргэлжилнэ.

Орон нутагт:

-Увс аймгийн Ховд сумын 100 жилийн ойн баяр наадам болно.