Т.ЧИМГЭЭ, Б.СОДНОМДАРЖАА НАРЫН ЗӨРЧИГДСӨН ЭРХИЙГ СЭРГЭЭХ АСУУДЛААР АЖЛЫН ХЭСЭГ БАЙГУУЛАВ

Төр, нийгмийн нэрт зүтгэлтэн С.Зоригийн амийг хөнөөсөн гэх хэргээр ял эдэлж, эрүүдэн шүүгдсэн Т.Чимгээ, Ц.Содномдаржаа нарын зөрчигдсөн эрхийг сэргээх, хохирлыг нөхөн төлүүлэх, дэмжлэг үзүүлэх асуудлаар ажлын хэсэг байгуулж, олон улсын байгууллагатай хамтарч ажиллах шийдвэр Засгийн газрын хуралдаанаас гаргажээ. Энэ ажлын хэсгийн  ахлагчаар Хууль зүй, дотоод хэргийн дэд сайд Б.Солонго ажиллана.

Ажлын хэсэгт ХЭҮК, ШЕЗ, Эмнести интернэшнэл ОУБ, ЦЕГ, ТЕГ-ын төлөөлөл оролцох аж.

Энэ ажлын хүрээнд Б.Содномдаржаа, Т.Чимгээ нартай биечилсэн уулзалтуудыг хийнэ. Мөн олон улсын шинжээчид, хөндлөнгийн зөвлөхүүдтэй хамтарч ажиллана. Энэ асуудлыг олон улсад гаргах, цаашдаа Монгол Улсын иргэдийн эрх зөрчигдөхгүй байх дээр анхаарах шаардлагатай арга хэмжээнүүдийг авах ажээ.

Т.Чимгээ, Ц.Содномдаржаа нарыг яллагдагчаар татсан прокурорын тогтоолыг хүчингүй болгосон. Т.Чимгээ иргэний хэрэг үүсгэх нэхэмжлэл гаргасан ч нэхэмжлэлийг хүлээж авахгүй байгаа гэсэн гомдолтой байгаа талаар мэдээлэл ирүүлсэн гэнэ. 

Цаг хугацааны хувьд хэрэг хянан шийдвэрлэх ажиллагааны явцад яагаад эрхийг нь сэргээж, нөхөн төлбөр олгоогүй вэ гэх асуудлыг ажлын хэсэг дээр судалж, мэдээлэл өгөх ажээ.