АНУ-ИРАНЫ ЭНХИЙН ХЭЛЭЛЦЭЭ 21 ЦАГ ҮРГЭЛЖИЛСЭН Ч БҮТЭЛГҮЙТЛЭЭ

Исламабад хотод 21 цаг үргэлжилсэн АНУ-Ираны энхийн хэлэлцээ бүтэлгүйтлээ.

АНУ-ын дэд ерөнхийлөгч Жэймс Вэнс түүний ахалсан баг тохиролцоонд хүрэлгүйгээр Пакистанаас явж буй талаар мэдэгдсэн юм.

Вэнсийн хэлснээр Иран АНУ-ын тавьсан нөхцөлүүдийг, тэр дундаа цөмийн зэвсэг үйлдвэрлэхгүй байх амлалтыг хүлээн авахаас татгалзжээ.

Харин Ираны төрийн хэвлэл хэлэлцээ бүтэлгүйтсэн шалтгааныг АНУ-ын “хэтэрсэн шаардлага”-тай холбон тайлбарласан байна.

Энэ нь Вашингтон болон Тегеран хооронд сүүлийн хэдэн арван жилд болсон хамгийн өндөр түвшний шууд уулзалтуудын нэг байсан юм. Хэлэлцээ нь хэдэн долоо хоног үргэлжилж буй дайныг зогсоох энхийн гэрээ байгуулах зорилготой байсан ч ийнхүү бүтэглгүйтжээ.

Ираны Гадаад хэргийн яам өмнө нь хэлэлцээ амжилттай болох эсэх нь АНУ “хэтэрсэн шаардлага” болон “хууль бус шаардлага”-аасаа татгалзах эсэхээс хамаарна гэж мэдэгдэж байсан. Хэлэлцсэн гол асуудлууд нь Ормузын хоолой, цөмийн хөтөлбөр, дайны нөхөн төлбөр, хориг арга хэмжээ зэрэг байсан аж.

Ормузын хоолой нь “ноцтой санал зөрөлдөөн”-ий гол асуудлуудын нэг хэвээр байгаа гэж Tasnim News Agency мэдээлсэн юм.

Бенжамин Нетаньяху бямба гарагт Израил Ираны эсрэг тэмцлээ үргэлжлүүлнэ гэдгээ илэрхийлсэн. Тэрбээр “Миний удирдлага дор Израил Ираны террор дэглэм болон түүний холбоотнуудын эсрэг тэмцсээр байх болно” гэж сошиал сүлжээнд бичсэн байна. Израил АНУ болон Ираны хоороныд хэлэлцээнд оролцоогүй юм.

Дональд Трамп Цагаан ордны гадаа сэтгүүлчдэд мэдээлэл хийхдээ Ирантай хэлэлцээр байгуулагдах эсэх нь “ямар ч ялгаагүй” гэж мэдэгджээ. “Ямар ч тохиолдолд бид ялна. Хэлэлцээр хийсэн ч, хийгээгүй ч надад ялгаагүй” гэж тэр хэлсэн байна.

АНУ-ын цэргийнхэн бямба гарагт Ормузын хоолойд тавигдсан минаг цэвэрлэх бэлтгэл ажлыг эхлүүлсэн бөгөөд тэнгисийн цэргийн хоёр устгагч хөлөг тус хоолойгоор нэвтэрсэн гэж мэдээлжээ. Харин Ираны нэгдсэн цэргийн командлал энэ мэдээллийг үгүйсгэж, АНУ-ын хөлгүүд уг усан замаар нэвтрээгүй гэж мэдэгдсэн байна.

Tasnim News Agency агентлаг баталгаатай эх сурвалжаас иш татан мэдээлснээр, Иран хэлэлцээ хийх тал дээр яарах бодолгүй байгаа аж.

Мөн АНУ “зохистой хэлэлцээр”-ийг зөвшөөрөх хүртэл Ормузын хоолой дахь нөхцөл байдалд ямар ч өөрчлөлт гарахгүй гэжээ.

Ойрхи Дорнод дахь дайныг зогсоох зорилготой олон цаг үргэлжилсэн хэлэлцээ ямар ч үр дүнд хүрэлгүй өндөрлөсний дараа АНУ болон Иран гал зогсоох тохиролцоогоо заавал биелүүлэх ёстой гэж Пакистаны Гадаад хэргийн сайд Ишак Дар онцолжээ. Тэрбээр “Талууд гал зогсоох амлалтаа үргэлжлүүлэн мөрдөх нь зайлшгүй чухал” гэж хэлсэн байна.

Мөн Пакистан улс ойрын өдрүүдэд Иран болон АНУ-ын хоорондын харилцаа, хэлэлцээ, яриа хэлэлцээг дэмжихэд өөрийн үүргийг үргэлжлүүлэн гүйцэтгэнэ гэдгийг онцолжээ.