​ “Крокус”-т 100 гаруй хүний амийг аварсан 15 настай хүүг “Спартак Москва” урив

ОХУ-ын Москва хотын ойролцоохь “Крокус Сити Холл” концертийн танхимд алан хядагчид халдаж 133 хүний амийг бүрэлгэж, 140 гаруй хүн шархдсан аймшигтай явдал болсон.
Тэгвэл алан хядах ажиллагааны үеэр айж цочирдсон олон хүний амийг 15 настай киргиз хүү Ислам Халилов аварсан байна. Хүү “Крокус”-ын хувцас хэрэглэл дээр ажиллаж байсан бөгөөд айж сандарсан хүмүүс мухар булан руу хуйлран гүйлдэхийг хараад аюулгүй газар руу гарах замыг зааж өгөхийн зэрэгцээ өөрөө ард нь үлдэж, бүх хүнийг гаргасныхаа дараагаар гарчээ.
“Хүмүүс олноороо хуйлран гүйлдэж эхэлсэн. Би ч гэсэн эхэндээ хурдхан гараад зугтая гэж бодсон л доо. Гэвч аливаа асуудал болоход яаж ажиллах талаар зааварчилгаа өгсөн байдгийг гэнэт санасан. Тэгээд тэр зааварчилгааны дагуу зөв ажиллахыг хичээсэн. Хүмүүсийг эхэлж гаргаад, өөрөө сүүлд нь гарна гэсэн зааварчилгаа юм. Тиймээс би хүмүүст хаашаа гарахыг зааж өгөөд, өөрөө хамгийн ард нь явж, бүх хүн гарсны дараагаар тэндээс гарсан. Наашаа гранат шидэх юмуу буудахвий гэж их айсан ч азаар хаалгыг маш түргэн нээж, хүмүүсийг гаргаж чадсан” хэмээн 15 настай хүү Ислам өгүүлжээ.
Харин хүүгийн ээж Айпари “Би болсон явдлын талаар сонсоод маш их айж, их уйлсан. Ийм аймшигтай явдлаас хүүг минь амьд үлдээсэн бурханд талархая. Хүү маань их айж сандарсан байсан. Одоо би хүүгээрээ маш их бахархаж байна” хэмээн өгүүлжээ.

 
Ислам хүүгийн аав ээж нь киргиз. Харин хүү Орост төрж өссөн юм байна.
Хүү “Спартак Москва” клубын үнэнч хөгжөөн дэмжигч тул тус хөлбөмбөгийн клубынхэн хүлээн авч, хүндэтгэл үзүүлж, өмсгөлөө бэлэглэжээ.
“Ислам хүүг бид урьж, баатарлаг үйлсэд нь баяр хүргэлээ. Найзуудтай нь хамт стадионоор аялуулж, багийнхантайгаа танилцууллаа. Мөн нэр бүхий өмсгөл бэлэглэсэн. “Спартак” клубын талбайдаа хийх бүх тоглолтын багц тасалбарыг бэлэглэлээ. Ийм хөгжөөн дэмжчигтэйгээрээ маш их бахархаж байна” хэмээн “Спартак Москва” клубын зүгээс мэдэгджээ.
Мөн хүүг Оросын рэппэр Моргенштерн 1 сая рублиэр шагнасныг ээж нь ярьсан байна. “Тийм ээ, Моргенштерн бидэнд 1 сая рубль бэлэглэж шилжүүлсэн. Бид зээлтэй бас өртэй. Түүнийгээ дарна” хэмээн Айпари ярьжээ.
.
Р.Гэгээ