Трамп дайны явц ямар сайн өрнөж байгаа болон АНУ-ын цэрэг армийн гүйцэтгэл итгэмээргүй сайн байгааг дахин онцолж, өнгөрсөн долоо хоногт Ираны нутагт сөнөсөн АНУ-ын F-15 сөнөөгч онгоцны хоёр дахь нисгэгчийг түүхэн ажиллагаагаар аварсныг сайшаалаа.
Тэрбээр Тегеранд өгсөн сүүлийн буюу мягмар гарагийн орой 20 цаг гэхэд Ормузын хоолойг нээх шаардлагынхаа талаар ярихдаа “Бүх улсыг ганцхан шөнийн дотор устгаж чадна, тэр шөнө нь магадгүй маргааш шөнө ч байж мэднэ” гэж нэмж хэлжээ.
Хоёр дахь нисгэгчийг аврах асар том ажиллагааны талаар дахин дурдахдаа Трамп АНУ-ын зэвсэгт хүчинд түүнийг эх оронд нь авчрахын тулд шаардлагатай бүхнийг хийхийг тушаасан гэжээ. Тэрбээр “Бид нэг ч америк хүнийг орхидоггүй” гэсэн байна.
Түүний хэлснээр онгоцны багийн хоёр гишүүн хоёулаа шүхрээр бууж, Ираны нутаг дэвсгэр дээр газарджээ. Аврах багууд “маш хүчтэй дайсны галын дор” ажилласан бөгөөд нэг нисдэг тэрэг “суманд оногдсон” гэж тэр хэлсэн байна.
Ерөнхийлөгч тухайн онгоцонд байсан нисэх багийнхан болон байлдагчид хамтрагчаа аврахын тулд онцгой өндөр эрсдэл үүрсэн гэж онцолжээ. Хоёр дахь нисгэгч нэлээд хүнд гэмтэж, Ираны Исламын Хувьсгалд Гвардын Корпусын “террористуудаар дүүрэн бүсэд” гацсан байжээ.
Трампын хэлснээр тэр нисгэгч их хэмжээний цус алдаж байхдаа хад асган дээгүүр авирч байршлаа дамжуулсан байна. Аврах ажиллагаанд нийт 155 нисэх хэрэгсэл, үүнд 4 бөмбөгдөгч онгоц, 64 сөнөөгч, 48 шатахуун цэнэглэгч, 13 аврах онгоц оролцсон гэж тэр хэлжээ. Тэд бараг 48 цаг гацсан байсан нисгэгчийг ямар ч хохиролгүйгээр нутаг дэвсгэрээс гаргаж чадсан байна.
Эцэст нь Трамп “Бид бол дэлхий дээрх хамгийн хүчирхэг цэрэг арми” гэж онцолжээ.
Саудын Арабын Батлан хамгаалах яам тус улсын зүүн бүс рүү чиглэсэн 7 баллистик пуужинг агаараас устган саатуулсан бөгөөд устгалын дараах хэлтэрхийнүүд эрчим хүчний байгууламжуудын ойролцоо унасан гэж мэдээлжээ. Мөн мэдэгдэлд дурдсанаар учирсан байж болзошгүй хохирлыг үнэлэх ажил одоогоор үргэлжилж байна.
Тус мэдэгдэлд Ираныг шууд нэрлээгүй ч Персийн булангийн бүс дэх АНУ-ын холбоотнууд руу цохилт өгөх ажиллагааг Иран үргэлжлүүлж байгаа гэж үзэж байна.
НҮБ Ормузын хоолойн тухай сулруулсан тогтоол дээр санал хураахаар боллоо
НҮБ-ын Аюулгүй байдлын зөвлөл мягмар гарагт Ормузын хоолой дахь худалдааны усан тээврийг хамгаалах тухай тогтоолд санал хураахаар төлөвлөж байгаа ч уг баримт бичгийг нэлээд сулруулсан хэлбэрээр оруулж ирсэн байна. Учир нь хориг тавих эрхтэй БНХАУ хүч хэрэглэхийг зөвшөөрөх заалтыг эсэргүүцсэн гэж дипломат эх сурвалжуудын мэдээллийг иш татан Reuters агентлаг мэдээлжээ.
15 гишүүнтэй зөвлөлийг одоогоор даргалж буй Бахрейн улс тогтоол батлуулахын тулд хэд хэдэн хувилбар боловсруулж, БНХАУ, ОХУ зэрэг орнуудын эсэргүүцлийг даван туулахыг оролдсон байна. Reuters агентлагийн үзсэн хамгийн сүүлийн хувилбарт хүч хэрэглэхийг шууд зөвшөөрсөн заалт бүрэн хасагджээ.
Үүний оронд тогтоолын төсөлд “Ормузын хоолойгоор дамжин өнгөрөх худалдааны далайн замыг ашиглах сонирхолтой улсуудыг нөхцөл байдалд нийцсэн, хамгаалалтын шинжтэй хамтын ажиллагааг уялдуулахыг хүчтэй уриалж, навигацийн аюулгүй байдал, хамгаалалтыг хангахад хувь нэмэр оруулахыг дэмжинэ” гэж тусгасан байна.
Мөн ийм оролцоо нь “худалдааны болон ачааны хөлөг онгоцуудад хамгаалалтын дагалдан явах үйлчилгээ үзүүлэх” зэрэг арга хэмжээг багтааж болохыг дурджээ.
Түүнчлэн тогтоолд Ормузын хоолойгоор дамжин өнгөрөх олон улсын усан замыг “хаах, саатуулах, эсвэл бусад байдлаар саад учруулах оролдлогыг таслан зогсоох” хүчин чармайлтыг дэмжиж байгааг илэрхийлсэн байна.
Дипломатуудын хэлснээр сулруулсан хувилбар нь батлагдах магадлал илүү өндөр байгаа ч үнэхээр амжилттай батлагдах эсэх нь тодорхойгүй хэвээр байна. Уг тогтоолыг батлахын тулд дор хаяж 9 гишүүний дэмжлэг хэрэгтэй бөгөөд байнгын 5 гишүүн болох Их Британи, БНХАУ, ОХУ, Франц, АНУ-ын аль нь ч хориг тавиагүй байх ёстой.
АНУ болон Израйл хоёрдугаар сарын сүүлээр Ирантай дайн эхлүүлснээс хойш нефтийн үнэ огцом өссөн байна.
Сэтгэгдэл (0)
Сэтгэгдэл бичигдээгүй байна