Израилийн Батлан хамгаалахын сайд Исраэль Катц жиргээнд амиа алдсан дээд удирдагч Али Хаменеин оронд томилогдох Ираны ямар ч удирдагчийг хөнөөнө гэжээ.
Тэрбээр “Израилийг устгах төлөвлөгөөг үргэлжлүүлэх, АНУ болон бүс нутгийн улс орнуудад заналхийлэх, Ираны ард түмнийг дарлан мөлжих зорилготойгоор Ираны террорист дэглэмээс сонгогдох ямар ч удирдагч хэн байх, хаана нуугдаж байхаас үл хамааран хөнөөх ажиллагааны тодорхой бай болно” гэсэн байна.
АНУ-ын Конгрессын Сенатын танхим Ерөнхийлөгч Дональд Трампын Ираны эсрэг үйл ажиллагааны талаар санал хураалтыг өнөөдөр /2026.03.04/ явуулахаар товложээ. Ойрхи Дорнодыг аюулд учруулж буй энэ мөргөлдөөн нь Конгрессын хувьд онцгой сорилт болж байгааг зарим хэвлэл онцолж байна.
Конгрессын Төлөөлөгчдийн танхим мөн энэ долоо хоногийн сүүлээр уг асуудлыг хэлэлцэх мэдээлэл байна. Дайны эрх мэдлийн тогтоол Конгрессоор батлагдах магадлал тун бага бөгөөд батлагдсан ч Трамп хориг тавих нь бараг тодорхой байна гэж хэвлэлүүд мэдээлж байгаа юм.
Ираны Дээд удирдагчийн ахлах зөвлөх Мохаммад Мохбар Иран Америкт итгэдэггүй бөгөөд Вашингтонтой ямар ч хэлэлцээ хийх бодолгүй байна гэжээ. “Бид америкчуудад итгэх ямар ч итгэл алга, мөн ямар ч хэлэлцээ хийх бодолгүй байна” гэж тэр төрийн телевизээр ярьсан тухай олон эх сурвалж мэдээлжээ. Мөн Ираны тал Ирактай найман жилийн туршид явуулсан дайны адил энэ дайныг ямар ч удаан хугацаагаар үргэлжлүүлж чадна гэж мэдэгдсэн байна.
АНУ Иранд бараг 2000 байг оновчтой “оносон” гэж мэдэгдээд байгаа бол Иран Ормузын хоолойг “бүрэн хяналтдаа” байлгаж байгаа гэжээ.
Сэтгэгдэл (0)
Сэтгэгдэл бичигдээгүй байна