Их Британийн ашиг сонирхлыг нэн тэргүүнд тавьж, Эпштейний хэргийн бэлгийн хүчирхийллийн хохирогчдыг үл тоомсорлосон гэж тус улсын нэр хүндтэй прокурор асан Назил Афзар мэдэгджээ.
Тэрбээр Жеффри Эпштентэй холбоотой хэргийн материал нь төрийн ашиг сонирхолтой холбоотой үед цагдаа нар шуурхай ажилладаг атлаа бэлгийн хүчирхийллийн хэргийн хохирогчдыг үл хайхарч, орхигдуулж байна гэсэн байна.
Хааны яллах албаны прокурор асан Назир Афзал нь Хойд баруун Англид хүүхэд, өсвөр насныхны эсрэг бэлгийн хүчирхийлэл, мөлжлөгийн хэрэг үйлдсэн бүлэглэлүүдийг шүүхэд шилжүүлж байсан хүн юм.
Эпштейнтэй албан үүргийн хүрээнд олж авсан нууц мэдээллийг дамжуулсан байж болзошгүй гэх үндэслэлээр төрийн албан тушаалын зөрчилд сэжиглэгдэн ханхүү Эндрю болон сайд асан Петер Менделсон нарыг баривчилсан ч тэд өөрсдийгөө гэм буруугүй гэж мэдэгдээд байгаа.
Афзалын хэлснээр эмэгтэйчүүдэд ноцтой хохирол учруулсан гэх гомдлууд дээр ахиц дэвшил бараг гараагүй байна. Эпштейний хүсэлтээр хүний наймаанд өртсөн эмэгтэйчүүдийг Их Британид нисгэн авчирсан байж болзошгүй гэх асуудлыг цагдаагийн зургаан байгууллага шалгаж байгаа бол өөр хоёр нь бэлгийн хүчирхийллийн хэргийг нягталж байна. Гэвч эмэгтэйчүүдэд хохирол учруулсан гэх аливаа гомдлыг бүрэн хэмжээний эрүүгийн хэрэг үүсгэх хэмжээнд хүрсэн гэж аль ч байгууллага дүгнээгүй байгаа юм.
Афзал “Төр хохирогч болсон үед төр маш хурдтай хөдөлдөг. Харин эмэгтэйчүүд хохирогч болсон үед төр бараг хөдөлдөггүй” хэмээн онцолжээ. Түүний хэлснээр нэг эмэгтэй Эпштейн түүнийг Их Британи руу илгээж, тэнд халдлагад өртсөн гэж гомдол гаргасан бөгөөд “олон жилийн турш үл тоомсорлолыг мэдэрч байна” гэсэн байна.
Их Британийн терроризмтой тэмцэх албаны дарга асан Нейл Басу мөн АНУ болон Их Британийн эрх баригчид энэ асуудлыг олон жилийн турш нягтлан шалгаагүйг шүүмжилжээ. Мөн Виржина Жуффре хүчирхэг нөлөө бүхий хүмүүсийн оролцоотойгоор хүний наймаанд өртөж, дарамт шахалтад орсон нь эргэлзээгүй гэсэн байна.
Их Британийн цагдаа нар Эпштейнтэй холбоотой АНУ-ын Хууль зүйн яаманд хадгалагдаж буй засвар хийгдээгүй эх баримтууд шаардлагатай гэж мэдэгдсэн. Афзалын үзэж буйгаар энэ ажиллагааг нэг төв байгууллага, тухайлбал Үндэсний гэмт хэргийн агентлаг зохицуулах ёстой бөгөөд ингэснээр АНУ-ын Хууль зүйн яамтай шууд харилцах боломжтой гэжээ.
Цагдаагийн удирдлагуудын зөвлөл зохицуулах хороо байгуулж, хоёр удаа хуралдсан бөгөөд Эпштейний Их Британитай холбоотой баримтууд нэмэгдэн нийтлэгдэхийн хэрээр гомдлын “цунами” үүсэж болзошгүй гэж үзэж байна.
Fawcett Society-ийн гүйцэтгэх захирал Пенни Ист “Эпштейний файлуудад ил болсон гэмт үйлдлүүд нь зүгээр нэг албан тушаалын зөрчлөөс хавьгүй ноцтой. Жинхэнэ хариуцлага гэдэг нь цол хэргэм, өндөр тэтгэвэр, тансаг албан тушаалаа алдах явдал биш, харин хохирогч эмэгтэйчүүд, охидын төлөө эрүүгийн шүүхийн тогтолцоо бодит, хатуу арга хэмжээ авах ёстой” гэжээ.
Хөдөлмөрийн намын гишүүн, өсвөр насандаа бэлгийн хүчирхийллийн хохирогч болж байсан Натали Флийт “Хохирогчдын дуу хоолой шуугиан, улс төрийн драм дунд замхарчих вий гэхээс айж байна” хэмээн анхааруулсан байна.
Цагдаагийн байгууллагууд “Аль ч гэмт хэрэг нөгөөхөөсөө илүүд тавьж үзэх боломжгүй. Бүх мөрдөн шалгалт нотлох баримтад тулгуурладаг бөгөөд уялдаа холбоотой ажиллаж байгаа ч эдгээр үйл явц цаг хугацаа шаарддаг” хэмээн мэдэгдээд байгаа юм.
Сэтгэгдэл (0)
Сэтгэгдэл бичигдээгүй байна