АНУ-ын Ерөнхийлөгч Дональд Трамп Оросын эрх баригчид Украйн дахь зөрчилдөөнийг шийдвэрлэх талаар хэлэлцээр хийхгүй бол Оросын эсрэг шинэ хориг арга хэмжээ авна гэжээ. Энэ тухай нэгдүгээр сарын 21-нд Agence France-Presse (AFP) мэдээлсэн байна.
Ерөнхийлөгч Владимир Путин хэлэлцээр хийхийг зөвшөөрөхгүй бол АНУ Москвад нэмэлт хориг тавих эсэх талаар сурвалжлагчдын асуултад ер нь тэгэх байх гэсэн утгатай хариулт өгчээ.
Мөн нэгдүгээр сарын 21-нд Трамп Оросын эсрэг хориг арга хэмжээний дэглэмийг Украйн дахь зөрчилдөөн дуусах хүртэл хэвээр үлдэхийг зөвшөөрсөн юм.
Энэ өдөр Кремлийн төлөөлөгч Дмитрий Песков Путин, Трамп хоёрын хооронд утсаар яриа өрнүүлэх бэлтгэл хараахан явагдаагүй байгаа гэж хэлсэн байна.
Мөн АНУ-ын шинэ Төрийн нарийн бичгийн дарга Марко Рубио Украйн дахь зөрчилдөөнийг зогсоохыг Трампын эн тэргүүнд тавих зүйл гэж нэрлээд байгаа юм. Түүний хэлснээр "бэлтгэл ажлын нэг хэсэг" эхэлсэн байна. Тэрээр мөн зөрчилдөөний хоёр тал буулт хийхэд бэлэн байх ёстой гэжээ.
Сэтгэгдэл (0)
Сэтгэгдэл бичигдээгүй байна