Цэргийн дэглэм тогтоох оролдлого нь бүтэлгүйтэж, буруутгагдсан ерөнхийлөгч Юн Сок Ёлыг баривчлах тушаалыг биелүүлэхээр очсон мөрдөгчдийг Ерөнхийлөгчийн хамгаалалтын албаныхан дотогш нэвтрүүлэхгүй байна.
Ерөнхийлөгч Юныг дэмжигч иргэд олноор цугларч ордны гадна жагсаж байгаа нь байдлыг мөн хүндрүүлж байгаа аж.
Сүүлийн өдрүүдэд мянга мянган дэмжигчид Юныг буруутгасныг эсэргүүцэж, түүнийг баривчлахад нь саад болохын тулд ордны гадаа цуглаад байгаа юм.
Тушаалыг гүйцэтгэх багийн бүрэлдэхүүнд Өндөр дээд албан тушаалтнуудын авлигын хэргийг мөрдөх албаны 30 хүн, цагдаагийн 120 ажилтан байгаа бөгөөд тэдний 70 нь орон сууцны гадна хүлээж байгаа гэнэ.
Ерөнхийлөгч Юн Сок Ёлыг баривчлах тушаалыг гүйцэтгэх хугацаа нь даваа гараг хүртэл бөгөөд бямба эсвэл ням гарагт тушаал гүйцэтгэх нь олон хүний эсэргүүцэлтэй тулах эрсдэлтэй тул даваа гарагт тушаалыг гүйцэтгэх байх гэж ажиглагчид үзэж байна.
Юн Сок Ёлыг байцаалтад гурван удаа дуудахад бүгдийг нь үл тоомсорлон очоогүй учир Өндөр дээд албан тушаалтны авлигын хэргийг мөрдөх албанаас баривчлах тушаал гаргахыг хүссэн байна. Мөн Ерөнхийлөгчийн ордныг нэгжих зөвшөөрөл ч авчээ.
Ерөнхийлөгчийн хуулийн баг тушаалуудыг "хууль бус, хүчингүй" гэж үзэж байгаагаа илэрхийлсэн байна.
Хэрэв Ерөнхийлөгчийн хамгаалалтын алба болон түүнийг дэмжигчид баривчлах ажлыг зогсоохыг оролдвол албан үүргээ биелүүлэхэд нь саад учруулсан хэргээр тэднийг баривчлах болно гэж цагдаагийнхан мэдэгджээ.
Сэтгэгдэл (0)
Сэтгэгдэл бичигдээгүй байна