БНСУ-ын “Jeju Air” компанийн дахин нэг онгоц өмнө осолдсон онгоцтой ижил шалтгаанаар буюу газардах төхөөрөмжийн асуудлаас болж, нисэх онгоцны буудалдаа буцаж ирсэн талаар Yonhap мэдээлжээ.
Тус улсын Кимпу хотоос Жежүгийн чиглэлд өнөө өглөөний /2024.12.30/ 6 цаг 37 минутад ниссэн Jeju Air 7С101 онгоц хөөрснийхөө дараахан газардах төхөөрөмждөө асуудал байгааг илрүүлсэн байна.
Агаарын тээврийн компани газардах төхөөрөмжийн асуудлаас үүдэлтэй механик гэмтлийн талаар онгоцонд байсан 161 зорчигчдод мэдэгдэж, улмаар Кимпу руу нислэгээ 7 цаг 25 минутад буцжээ.
Газардах төхөөрөмж нь нислэгийн аюулгүй байдалтай шууд холбоотой чухал хэрэгсэл бөгөөд гэнэтийн газардах үед цохилтыг багасгахын зэрэгцээ нислэгийн аюулгүй байдлыг хангадаг юм.
Ням гарагт /2024.12.29/ Муан мужийн баруун өмнөд хэсэгт 179 хүний амийг авч одсон “Jeju Air”-ын агаарын ослоор газардах төхөөрөмжүүд бүгд ажиллахгүй байсан гэж үзэж байгаа юм. Эрх мэдэлтнүүд ослын шалтгааныг нарийвчлан тогтоохоор ажиллаж байна. Осолдсон онгоцонд 175 зорчигч, үүнээс БНСУ-ын 173 иргэн, Тайландын 2 иргэн, багийн зургаан гишүүн байсан бөгөөд тэдний хоёр нь амьд үлдсэн байна. Нас барсан 179 хүний цогцсыг олжээ.
БНСУ-д ослын улмаас долоон өдрийн үндэсний гашуудал зарласан юм.
Сэтгэгдэл (0)
Сэтгэгдэл бичигдээгүй байна