БНСУ-ын Ерөнхийлөгч Юн Сок Ёль цэргийн онц байдал зарласан нь дуулиан дэгдээгээд байна. Тэрбээр Хойд Солонгосын коммунист хүчнээс улс орноо хамгаалах зорилготой, сөрөг хүчин төрийн эсрэг үйл ажиллагаа явуулж бослого гаргахыг оролдсон талаар мэдэгдэлдээ дурдсан юм.
БНСУ-ын Үндэсний ассамблей яаралтай хуралдаж, нийт гишүүдийн олонх нь Ерөнхийлөгчийн тогтоосон цэргийн онц байдлыг цуцлах санал өгсөн байна.
БНСУ-ын Ерөнхийлөгчийн энэ үйлдэл түүнийг шүүмжлэх хандлагыг улам бүр нэмэгдүүлж байгаа аж. Ардчилсан намын шилдэг удирдагч Пак Чан Дэ Ерөнхийлөгчийг даруй ажлаа өгөх ёстой гэсэн байна. Харин өөр нэг намын дарга болох Чо Кук "Тэр бүх хүмүүсийг цочирдуулсан. Ерөнхийлөгч бол аюултай хүн. Ардчилал, Үндсэн хуульд заналхийлж байна" гэжээ.
Өмнөд Солонгосын ерөнхийлөгч Юн Сок Ёль 1960 онд төрсөн, 2022 оны тавдугаар сард тус улсын 20 дахь Ерөнхийлөгч болсон. Хойд Солонгостой холбоотой асуудалд илүү хатуу байр суурь баримтлахаа амласан тэрбээр ардчилсан журмаар сонгогдсон БНСУ-ын аль ч ерөнхийлөгчөөс хамгийн бага дэмжлэгтэйгээр уг албыг хаших болсон гэгддэг.
Өнгөрсөн долоо хоногт явуулсан санал асуулгад рейтинг нь 19 хувь болтлоо буурсан бөгөөд олон хүн улс орны эдийн засгийн талаар явуулж байгаа бодлого болон эхнэртэй нь холбоотой маргаантай асуудлаар сэтгэл дундуур байгаагаа илэрхийлсэн байна.
Юн хуулийн мэргэжлээр суралцсан бөгөөд прокурор байхдаа авлигатай тэмцэж нэрд гарсан, Ерөнхийлөгч асан Пак Гын Хег эрх мэдлээ урвуулан ашигласан хэрэгт буруутгахад чухал үүрэг гүйцэтгэсэн. Мөн 2019 онд тус улсын ерөнхий прокурорын хувьд Ерөнхийлөгч Мун Жэ Иний тэргүүн туслахыг залилан мэхлэх, хахууль авах хэрэгт буруутгаж байсан юм.
Сөрөг тал болох консерватив үзэлтэй Ард түмний хүч нам Юныг ерөнхийлөгчид нэр дэвшихийг санал болгосон байдаг. Түүнийг БНСУ-ын түүхэн дэх хамгийн бага зөрүүгээр ялалт байгуулсан гэдэг.
Ерөнхийлөгч болсноосоо хойш удаа дараа шүүмжлэлд өртөж ирсэн бөгөөд хүнсний барааны үнийн нэмэгдэл, эдийн засгийн асуудлууд, үг хэлэх эрх чөлөөг хязгаарлаж байна хэмээн түүнийг буруутгадаг.
Сэтгэгдэл (0)
Сэтгэгдэл бичигдээгүй байна