СУМ ЗООСОН ГАХАЙН ТОЛГОЙГ ДИ МАРИАГИЙН ААВ ЭЭЖИД ИЛГЭЭЖЭЭ

Анхель Ди Мариа Аргентины шигшээ багийнхаа замналыг Америкийн цомд түрүүлээд өндөрлүүлсэн. Энэ тэмцээнийг эхлэхээс хавьгүй өмнө буюу хэдэн сарын өмнө л энэ талаараа зарлачихсан байлаа.

Харин клубт бол тоглосон хэвээрээ байх юм. Гэхдээ мэргэжлийн хөлбөмбөгчийн замналаа эхлүүлсэн “Росарио Сентраль” клубтээ бол хэзээ ч эргэж очихгүй бололтой. Үүнд нэгэн том шалтгаан байгаа юм.

Өнгөрсөн намар Ди Мариа шигшээ багтаа тоглохоор эх орондоо очсон. Тэр үед Аргентинд хар тамхины бүлэглэлүүдийн нөлөө өсөж, аллагын тоо нэмэгдсээр байгаа тухай мэдээлэл цацагдаж байж. Үүнийг олж сонссон Ди Мариа “Росариод миний аав ээж, эгч амьдардаг болохоор чих тавихгүй байж чадахгүй юм. Ийм аймшигтай мэдээ сонсоод их цочирдлоо” гэжээ. Харин “Росарио”-д буцан ирж тоглох эсэх тухай асуухад “Итгэл, найдвар үргэлж байдаг шүү дээ” хэмээн хариулсан аж.

Хар тамхины бүлэглэлүүдэд Ди Мариагийн энэ ярилцлага таалагдаагүй бололтой. Росарио хотоос 20 километрийн зайд орших аав ээжийнх нь гэрийн үүдэнд нэгэн өдөр хар хайрцагтай зүйлийг үл мэдэгдэх хүмүүс орхиод хөдлөхдөө тэнгэр рүү дөрвөн удаа бууджээ.

Хайрцаг дотор сум зоосон гахайн толгой байх бөгөөд нэг зурвас хавчуулсан байж гэнэ. “Росариод эргэж ирээд хэрэггүй гэж хүүдээ хэлээрэй. Хэрвээ үгэнд орохгүй бол танай гэр бүлийнхнээс нэгийг нь хөнөөнө шүү. Та нарыг Максимилиано Пульяро ч аварч хамгаалж дөнгөхгүй. Бид зурвас мэтхэн өгч явдаг “гарууд” биш харин цогцос шиддэг юм шүү” хэмээн зурваст тэмдэглэсэн байв. Пульяро гэдэг нь Росарио хотын байх Санта-Фэ мужийн амбан захирагч юм байна.

Долоодугаар сард Ди Мариа тэрхүү зурвасын талаар илүү дэлгэрүүлж ярихдаа “Тийм аймшигтай илгээмж ирсэн. Сум зоосон гахайн толгой байсан. Хэрвээ “Росарио”-д буцаж ирвэл гэр бүлийнхнээс чинь нэгийг нь хөнөөнө гэсэн нь үнэндээ бол миний охин Пиаг хэлсэн юм” хэмээн ярьжээ.

Заналхийлсэн үйлдлүүд үүгээр өндөрлөсөнгүй. Өнгөрсөн зургаадугаар сард Росариогийн нэгэн  шатахуун түгээх станцын ойролцоо мотоциклтой хоёр этгээд буун дуу тасхийлгэж, “Ди Мариа, чамайг хүлээж байна шүү” хэмээн хашхирчээ. Энэ бүхэн Ди Мариаг эргээд унаган багтаа очих замыг эргэлт буцалгүй хаасан байж мэдэх юм.