Хууль зүй, дотоод хэргийн яам, БНСУ-ын Экспорт-Импорт банкны санхүүжилтээр хэрэгжүүлж буй “МОН-22: Шүүхийн шинжилгээний байгууллагын хүчин чадлыг сайжруулах” төслийг 2022 оноос хэрэгжүүлж байгаа бөгөөд энэхүү төсөл нь Монгол Улсад олон улсын стандартад нийцсэн техник, тоног төхөөрөмжөөр тоноглогдсон Шүүх анагаах ухааны шинжилгээний лабораторийн иж бүрэн цогцолбор барилга байгууламж байгуулах, гэмт хэргийг илрүүлэхэд шаардлагатай орчин үеийн дэвшилтэт техник, тоног төхөөрөмжөөр хангах, шүүх шинжилгээ хийх чадавхыг бэхжүүлэх зорилготой.
Төслийн хүрээнд Шүүх эмнэлгийн барилга байгууламж барих, эмнэлгийн тоног төхөөрөмж нийлүүлэх, шүүх шинжилгээний байгууллагын цахим мэдээллийн нэгдсэн систем хөгжүүлэх, мэдээллийн технологийн тоног төхөөрөмж нийлүүлэх” ажлыг гүйцэтгэгчээр сонгон шалгарсан БНСУ-ын компаниудын төлөөлөлтэй гэрээний хэлэлцээр хийх уулзалтыг өнөөдөр зохион байгуулав.
Уулзалтад төсөл хэрэгжүүлэгч талаас Хууль зүй, дотоод хэргийн яамны Төрийн нарийн бичгийн даргын албан үүргийг түр орлон гүйцэтгэгч Б.Батбямба, Төрийн захиргааны удирдлагын газрын дарга Ц.Уртнасан, Олон улс гэрээ, гадаад хамтын ажиллагааны газрын дарга Ч.Нарантуяа, Шүүхийн шинжилгээний ерөнхий газар, хэлэлцээрийн багийн ажлын хэсгийн төлөөлөл, гүйцэтгэгч талаас БНСУ-ын Myoungdu Сonstruction ХХК, Smart Кorea ХХК, Atwom ХХК-ийн төлөөлөл оролцлоо.
Талууд энэ удаагийн уулзалтаар ажил гүйцэтгэхээр сонгон шалгарсан түншлэгч компаниудын танилцуулгыг сонсож, гүйцэтгэх хугацаа, гэрээний нөхцөл, ажлын нарийвчилсан төлөвлөгөө, төлбөрийн хуваарь, харилцан тохиролцсон гэрээний хавсралтууд болон бусад асуудлаар санал солилцлоо.
Мөн төслийн баг шуурхай ажиллаж, гэрээний төслийг яаралтай эцэслэхийг Хууль зүй, дотоод хэргийн яамны Төрийн нарийн бичгийн даргын үүргийг түр орлон гүйцэтгэгч Б.Батбямба үүрэг болголоо.
Сэтгэгдэл (0)
Сэтгэгдэл бичигдээгүй байна