БНСУ-ын Хууль зүйн яамнаас Засгийн газрын Өршөөлийн тусгай хөтөлбөрийн дагуу сүүлийн хоёр сарын хугацаанд Өмнөд Солонгост бичиг баримтгүй амьдарч байсан 8000 гаруй гадаадын иргэн тус улсыг орхин гарсан тухай албан ёсоор мэдээлжээ.
Тус яамны төлөөлөгч “The Korea Times” сонинд “Хууль бусаар оршин суугчдын тоог бууруулах зорилгоор өрнүүлсэн хоёр сарын аяны хүрээнд өнгөрсөн есдүгээр сарын 30-наас хойш өчигдөр хүртэл хууль бусаар оршин сууж байсан 8873 гадаадын иргэн эх орондоо буцсан. Хууль зүйн яамнаас энд хууль бусаар оршин сууж буй хүмүүсийн тоог бууруулахын тулд сайн дураараа явах олон хөтөлбөрийг хэрэгжүүлснээр цагаачлалын асуудалд тууштай хүчин чармайлт гаргаж байна" гэжээ.
Хөтөлбөрийн хүрээнд Солонгосыг сайн дураараа орхисон хүмүүс 30 сая вон (21,300 доллар) хүртэлх торгууль төлөхөөс чөлөөлөгдсөн бөгөөд тодорхой хугацааны дараа буюу 3-6 сарын дараа дахин нэвтрэх эрхтэй болно. Тус яамны хамгийн сүүлийн үеийн мэдээллээр нэгдүгээр сард энд амьдарч буй гадаадын иргэдийн тоо 2 сая 448 мянга болжээ. Эдгээрээс бичиг баримтгүй хүний тоог 420 мянга гэж тооцоолсон нь аравхан жилийн өмнө 200 мянга байснаас хоёр дахин өссөн үзүүлэлт юм. Энд хууль бусаар оршин сууж буй гадаадын иргэдэд тавих хяналтыг чангатгах уриалга нэмэгдэж байгаа энэ үед албаны хүмүүс өршөөлийн хөтөлбөр хэрэгжүүлэх зэрэг янз бүрийн стратеги боловсруулж байна. Уг нь сүүлийн өршөөлийн кампанит ажил арваннэгдүгээр сарын 30-ныг хүртэл үргэлжлэх ёстой байсан. Гэхдээ оны сүүлч агаарын тээврийн ачаалал ихтэй байгаа тул тус яамнаас кампанит ажлыг дахин хоёр сараар буюу 2025 оны нэгдүгээр сар хүртэл сунгахаар болжээ.
Эх сурвалж: Кoreatimes
Сэтгэгдэл (0)
Сэтгэгдэл бичигдээгүй байна