Нэр бүхий иргэний мэдээллийн дагуу Монгол Улсын Ерөнхийлөгчийн тухай хуулийн 6 дугаар зүйлийн 1 дэх хэсэгт “Ерөнхийлөгчийн бүрэн эрхийн хугацаа Үндсэн хуулийн гучдугаар зүйлийн 2 дахь хэсэгт зааснаар 4 жил байна.” гэж заасан нь Монгол Улсын Үндсэн хуулийн Гучдугаар зүйлийн 2 дахь хэсгийн “Ерөнхийлөгчөөр тавин нас хүрсэн, сүүлийн таваас доошгүй жил эх орондоо байнга оршин суусан, Монгол Улсын уугуул иргэнийг зургаан жилийн хугацаагаар зөвхөн нэг удаа сонгоно.” гэж заасныг зөрчсөн эсэх асуудлаар Үндсэн хуулийн цэцэд маргаан хянан шийдвэрлэх ажиллагаа үүсгэн шалгаж байна гэж Цэцээс мэдээллээ.
Монгол Улсын Үндсэн хуульд 2019 оны 11 дүгээр сарын 14-ний өдөр орсон нэмэлт өөрчлөлтөөр "Ерөнхийлөгчөөр тавин нас хүрсэн, сүүлийн таваас доошгүй жил эх орондоо байнга оршин суусан, Монгол Улсын уугуул иргэнийг зургаан жилийн хугацаагаар зөвхөн нэг удаа сонгоно." гэж хуульчилсан.
Ерөнхийлөгч У.Хүрэлсүх 2021 онд сонгогдсон бөгөөд зургаан жилийн хугацаагаар ажиллах анхны Ерөнхийлөгч болсон. Гэтэл Ерөнхийлөгчийн тухай хуулийн бүрэн эрхийн хугацаа нь 4 жил байна гэсэн заалтад одоо хүртэл өөрчлөлт ороогүй байгааг Цэцийн энэ мэдээ гарснаар л олон нийт мэдэв бололтой.
Сэтгэгдэл (0)
Сэтгэгдэл бичигдээгүй байна