Э.ҮҮРИЙНЦОЛМОН ОЮУНЫ ОЛИМПЫН НАСАНД ХҮРЭГЧДИЙН ХАМГИЙН ЗАЛУУ АВАРГА БОЛОВ

Оюуны олимпын хоёр дахь өдрийн тэмцээнд манай тамирчид олон бахдам амжилт үзүүлсэн бөгөөд дэлхийн 35 улсын өсвөр, насанд хүрэгчдийн ангилалд 12 төрлөөр 180 тамирчин өрсөлдөж буй тус олимп манай тамирчдын ялалтаар дүүрэн байна. 

Өсвөрийн дэлхийн аварга болж, Их мастер цолыг 13 насандаа хүртсэн Э.Үүрийнцолмон 14 насандаа  Оюуны олимпын насанд хүрэгчдийн хамгийн залуу аварга болов.

Цээж бодолтын "Mental Addition" буюу 10 оронтой 10 тооны нийлбэрийг олох нийт 10 бодлогыг маш богино хугацаанд алдаагүй хариу гаргах төрөлд Х.Анирлан 10 бодлогыг 3 минутад бодсоноор мөнгөн медалийн болзол хангажээ.  

Тэмцээний дөрөв дэх төрөл болох "Тооны марафон"-д бага болон насанд хүрэгчдийн ангилалд манай тамирчид иж бүрэн медаль хүртсэн байна.

Тухайлбал, насанд хүрэгчдийн ангилалд

• Э.Үүрийнцолмон – Алтан медаль /1168 цифр/
• Н.Мөнхшүр – Мөнгөн медаль /1124 цифр/
• О.Наранзул – Хүрэл медаль /940 цифр/

Бага насны ангилалд

• М.Гэгээн-Оюун – Алтан медаль /761 цифр/
• Т.Тунгалагжаргал – Мөнгөн медаль /572 цифр/
• О.Ирмүүн – Хүрэл медаль /320 цифр/ тус тус хүртжээ. 

Тэмцээний тав дахь төрөл болох "Флаш тоо"-нд мөн л бага болон насанд хүрэгчдийн ангилалд манай тамирчид иж бүрэн медалийн эзэд болцгоов.  

Тухайлбал, насанд хүрэгчдийн ангилалд  

• Ц.Номин-Эрдэнэ – Алтан медаль /312 цифр/
• О.Наранзул – Мөнгөн медаль /246 цифр/
• Г.Мянганбаяр – Хүрэл медаль /234 цифр/

Бага насны ангилалд:

• М.Гэгээн-Оюун – Алтан медаль /106 цифр/
• О.Ирмүүн – Мөнгөн медаль /52 цифр/
• Т.Тунгалагжаргал – Хүрэл медаль / 32 цифр/ тус тус хүртсэн байна. 

Оюуны олимп өнөөдөр гурав дахь өдрөө үргэлжилж байгаа юм.