Гү Хара 2019 оны 11 дүгээр сард амиа хорлосон. Үүний дараагаар түүний төрсөн ээж охиныхоо эд хөрөнгийг өвлөж авахаар гарч ирсэн тул ах нь эсрэг тэмцэж эхэлсэн юм. Хүүхдүүдээ багад нь буюу Гү Хараг 9 настайд нь орхиж явсан эмэгтэй 20 жилийн дараагаар эд хөрөнгийг нь өвлөж авахаар гарч ирсэн явдал нь олны ч дургүйцлийг төрүүлсэн.
Харагийн ээж охиныхоо оршуулга дээр инээмсэглэж, найз ододтой нь хамт зураг даруулахыг хүсч буй зураг, бичлэгүүд ч тарсан. Энэ нь тухайн эмэгтэйн атгаг санааг ил гаргасан үйлдэл гэж олон нийт үзсэн.
Гэвч хуульд хүүхэд нь нас барсан тохиолдолд эцэг эх нь эд хөрөнгийг шууд өвлөж авах тухай заасан байдаг. Тиймээс Харагийн ах нь энэ хуулийн эсрэг тэмцэж, “Харагийн хууль” гэх хөдөлгөөн өрнүүлж, гарын үсэг цуглуулж эхэлсэн юм.
Төрсөн эх болон ах хоёрынх нь энэхүү тэмцэл 2024 оны дөрөвдүгээр сарын 24-нд эцэслэгдэн шийдвэрлэгдэж, эх нь нэг ч зоос авахааргүй болжээ. Үл хөдлөх хөрөнгө байтугай, нэг ч зоос авахгүй байхаар шүүх шийдсэн байна.
Охиныхоо өсч торниход тусалж дэмжээгүй тул хөрөнгийг нь өвлөж авах эрхгүй гэж шүүх үзсэн байна. Мөн хөрөнгийг ээжид нь өвлүүлбэл шударга ёс, хүн ёсонд нийцэхгүй гэдгийг цохон тэмдэглэжээ.
Сэтгэгдэл (0)
Сэтгэгдэл бичигдээгүй байна