Мексикийн мисс Фатима Бош Miss Universe-2025 тэмцээний ялагчаар тодорлоо.
2025 оны арваннэгдүгээр сарын 4-ний өдөр 130 орны мисүүд бүгд оролцсон шууд дамжуулалтын үеэр тус тэмцээний Гүйцэтгэх захирал Нават Ицарагрисил Мексикийн мисс Фатима Бошийг ивээн тэтгэгчдийн уулзалтад ирээгүй хэмээн буруутгаж, камерын өмнө “тэнэг” гэж хэлсэн нь ихээхэн шуугиан дэгдээсэн юм.
Фатима хариу тайлбарлах гэсэн ч Нават захирал үгийг тасалж, түүнийг танхимаас гаргахыг хамгаалалтын ажилтнуудад тушаасан. Фатимаг хөөж гаргахад түүнийг дэмжсэн бусад миссүүд ч дагаж гарсан бөгөөд “Miss Universe 2024” тэмцээний ялагч Данийн Виктория Кьер Тейлвиг ч тэдний дунд байжээ.
Шууд дамжуулалтын үеэр болсон энэ үйл явдал маш богино хугацаанд TikTok, Instagram, X зэрэг сүлжээгээр тарж, “Miss Universe”-ийн түүхэн дэх хамгийн зоримог үйлдэл хэмээн олон нийт үнэлсэн юм. Энэхүү дуулианаас үүдэлтэйгээр Мiss Universe тэмцээний финалын шат явагдах уу, үгүй юу гэдэг дээрээ ч тулсан бөгөөд Нават хийсэн үйлдлийнхээ төлөө уучлал гуйснаар асуудал нааштай шийдэгдсэн билээ.
Фатима Бош энэ талаар “Би Тайландад хайртай. Би хэн нэгнийг үл хүндэтгэсэн удаа байхгүй. Танай захирлын намайг тэнэг гэж хэлсэн нь үл хүндэтгэсэн үйлдэл. Ингэж харилцахыг би хүлээн зөвшөөрөхгүй. Бид хүчтэй эмэгтэйчүүд” гэж хэлжээ.
Мөн "Эх орон минь намайг сонсох вий гэхээс айхгүй байгаа гэдгийг мэдээсэй гэж хүсэж байна. Би энд ирээд урьдынхаасаа илүү хүчтэй болсон. Надад зорилго, хэлэх зүйл бий. Би бол зүгээр будаж, хувцасладаг хүүхэлдэй биш. Эрхийнхээ төлөө тэмцэж буй охидын дуу хоолой болж, үүний төлөө бүхнээ зориулна гэдгээ хэлэх гэж ирсэн юм" гэж тэр ярьсан.
Фатима Бош Мексикийн миссээр шалгарахдаа ч эсэргүүцэлтэй тулгарсан гэнэ. Тэмцээнд Халиско мужаас ирсэн Йоанна Гутьеррес титмийг авна гэж олон хүн бодож байсан. Иймээс зөвхөн дөрвөн оролцогч Мексикийн миссийн тэмцээний ялагч болсонд Фатимад баяр хүргэж, үлдсэн охид "Халиско яллаа" гэж хашгирсан бол үзэгчид ч түүнийг шоолж байсан гэнэ. Бош түүнд баяр хүргэсэн өрсөлдөгчдөө "бүх утгаараа хатан хаан” гээд өөрийн ялалтаараа бахархахад нь хэн ч саад болохгүй гэжээ. "Сэтгэл санааны байдалд тань хэн ч нөлөөлөхийг зөвшөөрч болохгүй. Хэрэв чи титэм хүртсэн бол чи үүнийг авах хүртлээ хөдөлмөрлөсөн гэсэн үг” гэж тэр хэлжээ.
Түүний хувь тавилан энгийн бус. Фатима Бош Фернандес 2000 оны 5-р сарын 19-нд Табаско мужийн Вильяхермоса хотод төрсөн. Зургаан настайдаа тэрээр дислекси буюу олон анхаарал хомсдолын хэт идэвхжилийн эмгэг (ADHD)-тэй гэж оношлогдсон бөгөөд энэ нь сурахад нь сөргөөр нөлөөлсөн. Гэвч тэр тууштай хичээж, өөрийн боломжоо ашиглаж чаджээ. 16 настайдаа АНУ руу нэг жил суралцахаар ганцаараа явсан нь англи хэлээ сайжруулах боломжийг олгосон юм. 17 настайдаа Табаскогийн мисс болжээ. Бош нь Мехико хотын Ибероамерикийн их сургуулийг мода, загварын дизайны чиглэлээр төгссөн, мөн Италийн Милан хотод дүрслэх урлагийн академид үргэлжлүүлэн суралцсан. Фатима ажилдаа хаягдал материалыг ашигладаг бөгөөд эко загвар бий болгохыг хичээдэг.
Тэрбээр есөн жилийн турш хорт хавдраар шаналж буй хүүхдүүдэд тусалж, сайн дурын ажил хийж байна. Фатима жил бүр Табаскогийн хорт хавдрын төвд зориулж Зул сарын баярын тоглоом цуглуулах аян зохион байгуулдаг. Мөн байгаль орчин, сэтгэцийн эрүүл мэндийн асуудлаар хүмүүнлэгийн болон мэдээллийн ажил зохион байгуулж, цагаачдад дэмжлэг үзүүлдэг гэнэ.
Miss Universe тэмцээний дэд байрыг Тайландын мисс эзэлж, Венесуэл, Филиппин, Зааны ясан эрэг улсын миссүүд удаах байрт оржээ.
Сэтгэгдэл (0)
Сэтгэгдэл бичигдээгүй байна