МЭДДИСОН ДОТОР ХҮНТЭЙГЭЭ ЯРИЛЦААД ӨГӨӨМӨР СЭТГЭЛ ГАРГАВ

Европа лигийн “Тоттенхэм” – “АЗ Алкмаар”-ын тоглолтын хувь заяаг шийдсэн ганц гоол дээр бяцхан түүх өрнөөд өнгөрөв. 

Энэ тоглолтод багаа ахлан гарсан Жэймс Мэддисон хэн пенальти цохихыг шийдэх бүрэн эрхтэй тул боломж олдоход өөрөө цохичихъё гэж шийдсэн юм. Гэвч пенальти авчирсан бразил довтлогч Ришарлисон бас гоол хийчих санаатай бөмбөг барьчихаад өгдөггүй. Ахлагчийн хувиар Мэддисон “мундагдаж” байгаад бөмбөгийг авсан ч гэлээ хэдхэн секундын дараа пенальтийг мөнөөх Ришарлисон гүйцэтгэлээ. 
Ришарлисон яаж бөмбөгийг буцаагаад авчихав? Арай ахлагчаа нударчихсан юм биш биз дээ? гэх асуулт үзэгчдийн тархинд харван орж ирсэн байхыг үгүйсгэх аргагүй. Тэгвэл юу болоод өнгөрснийг удалгүй харууллаа.
Мэддисон бөмбөгийг Ришарлисоноос авчихаад торгуулийн талбай дундуур намар навчис хөлөөрөө хийсгэн алхах мэт хэсэг зуур бодолхийлэн явснаа өөрөө очоод бөмбөгөө өгсөн байх юм. Ришарлисон ч дуун дээр нь аваад, гоол хийж чадлаа.
Тоглолтын дараа сэтгүүлчид яг юу болоод өнгөрснийг лавлахад Мэддисон "Эхэндээ бид хоёр хоёулаа пенальти цохихыг хүссэн л дээ. Би ахлагчаар гарсан учраас өөрөө цохъё гэж бодсон юм. Гэвч Ришарлисон гэмтэлтэй байгаад саяхан эдгэсэн, хэсэг хугацааны турш тоглоогүй болохоор эргээд итгэлээ олоход хэцүү байдгийг мэднэ. Энэ гоол түүнд их урам зориг өгнө гэж найдъя" хэмээн хэллээ.
Дасгалжуулагч Анже Постекоглу ч Мэддисоны ухаалаг, өгөөмөр сэтгэлийг үнэлж буйгаа хэлээд амжсан юм. “Мэддерс их өгөөмөр сайхан чанар харууллаа. Ричи хүнд үеийг туулсан тул дэмжлэг хэрэгтэйг мэдэрсэн байх. Довтлогч хүнд гоол хамгийн сайн эм байдаг. Энэ их сайн нүүдэл байлаа” хэмээн Постекоглу өгүүлжээ.